四年班開學至今，阿仔都未上軌道，令我不禁大叫：「搞乜呀！」
二至三年班阿仔經常都做到「做哂功課返屋企」的，我們還有看看書，玩玩電腦的時間，而家唔得囉！日日都做到八九點鐘才有得上床睡覺，而且阿仔的功課錯誤率大增，迫得我要替他檢查功課，否則他又再多一樣功課：改正！以前我從不檢查他的功課的。
功課錯什麼呢？字醜樣（沒有操練），計錯數（少操練），grammar錯（少操練），一句講哂，我訓練阿仔一向集中在用腦而非用手，例如背東西是不用寫字的，就算要佢寫的時候，我又不要求寫得靚，結果四年班就唔掂啦，海量的功課都一定要寫寫計計，咁自然做得慢啦！
我仔係腦快手慢的人，要他用腦的東西可以學很多，學得又快，叫他用手的東西就唔得。人總有強項弱項嘅，不過總不能讓短板短下去，看來是時候操練了！
不過功課真係堅多喎！上星期五成十三樣，多成咁，已經係操練啦！仲使鬼再操咩？突然想起前年有個高小的家長說：「你而家係蜜月期呀，好好享受下，由四年班開始超多功課。」
又要唱無間道了！
4 則留言:
去年我都同你一樣，日日近10樣功課，加上阿仔玩大過天，不太願意在學校做功課，而且老師要求超嚴格，字體醜樣，數學間直缐唔直或出界都當錯要改正，所以额外多了很多改正功課。我反而沒有因此而幫佢check 功課，因為我要佢改同老師要佢改都係要改，只是早D定遲D，但我要佢改，佢會發脾氣，也依頼了我幫佢。所以去年常常做功課做到喊。我不斷同佢講做快D就可以玩，但佢完全做唔到。但好奇怪，今年功課更多，但大部分時間佢都只做剩1-2様回家。今年佢的字體工整很多，錯誤也少很多。見到佢集中咗。以為佢每個小息都只做功課，又唔係喎，老師派佢做N噤多職務，所以小息都好忙。但佢同我講會偷時間來做，例如轉堂或放學後活動未開始之前小小時間。（佢以前一定唔會）我只可以講係要時間讓佢哋長大，突然間當佢哋明白到專心就可以做快D，一次過小心做好，好過要重做，而且做完功課就係佢的free time. 之前同佢講N次，佢無法明白，但今年好似突然「叮」一聲明白了。當然佢仲有很多同學每日要做到10點幾。所以男仔，係要時間等佢諗通。
希望你都早日進入佳境。
咁即係話，你間學校其實係早咗一年谷，我感覺到學校今年係谷咗，小一至小三算係輕鬆啲，小四發力。
我們的處事原則是「健康第一」，十點睡是絕不容許的事，我幫佢，佢昨晚都搞到九點，唔幫就一定要十點。其實我們一向八時半上床。
在訓練和健康之間做取捨，我們家永遠是訓練讓路的。絕對心軟，哈哈哈！
我仔小三都比小二多二功課，我們還要每天練琴，時間很緊迫....
你仔嗰間都係名校，小三開始谷都唔奇喎！
練琴capture的時間真是很多！
發佈留言