第一本衛斯理

有網友是衛斯理迷， 好幾次同我提及 衛斯理小說， 我一直都打算遲啲自己睇完，再介紹畀個仔睇，因為我知道有部分嘅衛斯理小說有不良嘅內容，所以我對每一本成人小說， 態度都比較謹慎，後來網友話佢好清楚每一本小說嘅內容，所以由佢推介，佢第一本推介嘅就係大廈。 佢話呢本係倪匡嘅成名作。

以前我都有睇過一兩本衛斯理小說， 咁啱我睇嘅係有不良內容嘅。呢一本我攞返嚟之後都充滿好奇，自己都睇咗一次。就算已經係寫於二十幾年前， 而家睇呢本書依然冇過時嘅感覺，所以話倪匡先生可以話係走在時代尖端。

呢本小說都頗驚險刺激，當我睇完嘅時候我知道對我個仔嚟講，有幾個難點，難點係乜嘢呢？第一，人物嘅心理對話 比起平時兒童小說更加深入，並且涉及對對方的心理猜想，所以我估個仔會有少少唔明白， 去到結局， 講嗰架電梯其實係升咗上四度空間， 而果度嘅時間係比較慢， 當時間慢咗大廈又會高咗一倍，甚至更多， 我自己都睇到一舊雲，不過總算明白嘅！

開始睇呢本書，我一早就同阿仔協議，唔可以 一次過睇曬，因為啲字太細怕傷眼，要迫佢分開兩三日睇，每半個鐘頭一定要休息， 於是乎我set咗timer。

第一日睇，食飯前睇咗半個鐘，食飯後繼續睇，臨上床睡覺嘅時候，我撳停左timer。

呢個時間包括咗去廁所和刷牙， 但係不包括吃飯，即係個半鐘頭，咁阿仔睇咗幾多頁呢？

答案係151頁。

第二日早上，我因為有啲嘢要做先離開屋企，之後再同學仔、老公和公公婆婆飲茶，喺飲茶嘅時候，阿仔主動提起這本書，原來佢自己喺屋企時已經睇完，佢仲同我談論個結局，我都好詫異， 我初初以為佢會唔明乜嘢係四度空間，但係原來呢啲完全對佢嚟講冇任何理解上嘅困難！

昨晚看到151頁的時候，我見佢雙目茫茫然，問佢睇成點，完全唔答我。我仲以為佢唔明本書做乜，但係當佢睇曬成本，佢原來係明嘅，可能係中間嗰個懸疑嘅時間太長，佢一頭霧水，最後當答案揭盅，佢就明白整個故事講乜了！

後記：

今朝煮早餐時，阿仔突然說：「 媽咪，我知道殺人點樣可以毀屍滅跡。」我嚇了一大跳，說：「什麼？！！！」

他說：「將屍體用果部電梯運送去四度空間，現實世界便會自然消失。」

哦~睇完科幻小說翕下啫~嚇得我。