團年飯的靈魂

昨晚， 我家提早吃團年飯，這餐飯發生了一段小插曲。

我99是isfj, 她有特別好的手藝，她細心，她煮的餸菜很認真。我見別人影出嚟團年飯的相片，和我奶奶煮的食物比較，我會覺得我奶奶嘅細緻度係比較高嘅，雖然我冇食人哋嘅團年飯，但係我廚藝經驗都豐富，當你見到蒸魚上面那几條蔥， 你就會知道煮飯嘅人夠唔夠細心。細不細心係會影響個餸菜嘅味道。

講返我奶奶，呢一種性格嘅人，係一個非常好的手藝者，照顧者，但佢唔係一個好嘅管理者，佢過年成餐飯差唔多都係佢煮曬，而新抱我，只係可以做一個餸菜，另外就係幫手焯下蔬菜， 烚下乳鴿，行行企企，原因係奶奶係唔識分配工作畀人，佢好喜歡將工作往自己嘅身上摃， 累得自己要命，但我又唔夠膽去做得太多，原因係佢買咗好多名貴嘅食材，例如：海參、冬菇、鮑魚、 帶子...... 呢啲食材我唔夠膽亂咁整，如果佢交畀我整㗎，我係可以整到，但係質素無保證，所以佢只係將一味餸交畀我整，就係鎮江肴肉。

奶奶都差不多八十歲，仲成日煮咁多嘢，其實好辛苦，佢又唔會話識得將部分嘅餸菜變成外賣，應該係話佢覺得咁樣唔夠完美，佢係一個完美主義者。

而發生嘅呢段小插曲，就令成餐飯欠缺咗靈魂： 團結。

無論餸菜做得幾咁好，一齊坐埋食團年飯，最重要嘅就係和和氣氣，一家人團團年年。

餐飯嘅買餸錢係我先生俾嘅，然之後，我叔仔一家三口上嚟嘅時候，問我奶奶，佢要唔要買半隻燒鵝，我奶奶話唔使，叫佢買個沙田柚算了。

呢件事，就令到我先生好唔高興，我先生唔係話小器到，唔可以容忍人哋兩手空空上嚟，所謂冰封三尺非一日之寒，永遠一件小事，就會成為導火線，將一直潛藏嘅問題引爆出嚟。

我奶奶係唔公平嘅，佢永遠要求哥哥付出，但係不會要細佬付出。 例如：佢叫哥哥在淘寶淘了衣服鞋襪畀細佬，然之後叫細佬打個電話多謝哥哥，細佬話覺得唔使，佢係唔會要求細佬一定要打呢個電話。又例如：我先生whatsapp個細佬，想同佢講兩句嘢，細佬唔覆，我奶奶係唔會要求佢個細仔，必定要回覆whatsapp，亦都唔會傳達哥哥唔高興呢件事， 根本完全沒當是一回事， 那其實是很不尊重哥哥的表現。

總之咁多年嚟，哥哥谷谷埋埋，有一日，就為咗半隻燒鵝發咗出嚟，佢同佢阿媽講：「如果佢唔攞半隻燒鵝嚟，就唔好上嚟食團年飯呀！」

我奶奶覺得，我老公好小氣，為咗半隻燒鵝，同個細佬斤斤計較，其實冰封三尺非一日之寒，當一個媽媽唔公道嘅時候，兩兄弟係永無寧日，當媽媽對兩個仔嘅要求唔一樣嘅時候，兩兄弟不和是在所必然。

各位有兩個仔女嘅，要特別小心，所謂嘅公平，唔係話，買一件玩具畀a，一定要買另外一件玩具畀阿b，唔係咁樣， 玩具係小事， 大家可以學習分享。所謂公平，係你對a有要求，必須要對b有相對要求。

例如：要求哥哥對細佬謙讓及付出， 就一定要要求細佬對哥哥尊重，兩樣都係重要嘅品格，冇可能對一個有要求，對另外一個冇要求。每當你 對其中一個有一樣要求嘅時候，對另外一個亦都有一樣適合佢身分嘅要求，咁就叫做公平啦！