News watch English

自從阿仔罵過爸爸「you are an old man and a fool」之後，爸爸就耿耿於懷，阿仔做事慢吞吞的，爸爸就話佢you are young and fool(好奇媽按：應該是you are young but foolish才對) 我莞爾：「你應該用返你嗰句『生返半打溝稀你』的英文來話佢，做乜成日用阿仔嗰句啫！」

阿仔在一旁說：「我知！溝稀的英文係water down!」

阿仔點識？是在tvb的節目「睇新聞講英文」學回來的。

這個節目大約每日兩分鐘，有興趣的大家自己在網上睇返。我們用my tv super 睇，每集都播一次廣告，個廣告仲長過條片，睇到我發忟憎，想睇多一次又要睇多次廣告，想死，大家千萬唔好裝my tv super, 我那個是電訊公司送的，我才用。

講返這個節目，我覺得製作質素很好，又清楚，每日學少少新聞英文，咁就會識很多「貼地」的英文。

其實我們平時學校教的英文係唔多貼地㗎，有時啲外國親戚在Facebook對話，我有好多都睇唔明！明明正式英文書都睇得明，但人地日常對話睇唔明，點解？就係因為我們學習的英文唔貼地囉！學校基乎冇教過idioms咁滯，如果想學，要自己加培努力了！

不過想睇完電視就記得住，學得識，用得着，真是唔係咁容易，最少要做成字咭，反覆温習才行。對媽媽來說是enormous challenge!

不適合留在家帶小孩的人

很多媽媽都想自己湊自己的小朋友，但真是人人適合嗎？

我以前從自己的角度出發，覺得自己湊一定係好事，我幾年前的blog一定係贊成自己湊的。但人長了幾歲，觀點又有些改變了，因為見識多了。

如果個個媽媽都像我那麼喜歡自己的小孩，當然是自己湊的好。什麼？有人不喜歡自己的孩子嗎？有！而且一定比你想像的多。正確來說，她們不是不喜歡自己的孩子，是比起孩子，她更喜歡某些東西，例如更喜歡自己，更注重自己的個人感受。

我識得有媽媽，放工第一時間去健身做yoga, 孩子在電話中幽幽地說：「 你快啲返嚟啦，媽咪，我等到你十二點。」她重述給我聽是嘻嘻哈哈的，我就聽到肉都赤埋，係我聽到個仔咁講，即刻會卜返屋企。但她不是，而且一點內疚感都沒有。

有媽媽撩我一齊去旅行，撩了好幾次要「四個傻婆去旅行」，其餘三個都贊成，其中還有三子之母，我托詞老公唔俾，心中係：「采你都傻！」我唔明，佢地有份工，見孩子時間又不多，為什麼難得有長假期，不是陪小朋友，而係自己同朋友去旅行？佢做得出我做唔出，我仔的每一個長假期，我都要痴住個仔，他是我的小情人，我怕他長大了，我想再陪在他身邊也不行，所以要享受當下。佢好羨慕我唔使返工，我覺得「俾你唔返工，除了屋企少了一份收入，有什麼好處？」唔知點解，好多女人都覺得掉低個小朋友俾老公俾工人俾99湊，自己出街同朋友飲飲食食係天經地義的。好似借咗個肚俾人生咗個仔就完成了任務咁。

你說她們不愛自己小朋友嗎？我又肯定不是，但她們沒有將愛和責任連在一起！

我99話，我叔仔一家愛隻狗愛到不得了，又攬又錫，如果隻狗病咗又好緊張咁帶佢去睇獸醫，但唔明點解佢地會好少幫隻狗沖涼，好少餵隻狗飲水。我99唔鍾意隻狗，但會記得俾水佢飲。愛一隻狗可以愛得來不負責任，但愛一個人就唔得囉！

除了不愛照顧孩子的媽媽不應該留在家之外，還有「沒用的中年婦女」也應該出去工作。因為這些媽媽煮東西很難吃，還會煮一些很沒營養的東西給孩子吃，都算了，連教讀書也不成，她們自己不讀書又迫孩子讀書，但自己又唔識教，仲成日向小朋友發脾氣。她們出去工作，可減少對孩子的滋擾。

有一次，有一個嫲嫲同我講，佢新抱想唔做嘢返屋企湊仔，但佢仔唔肯，佢仔私下同佢講：「女人一唔做嘢就會胡思亂想。」我聽完莫名其妙，但過咗兩三年，我開始明佢講乜，因為我有兩個朋友辭了工回家湊孩子之後，突然走了去信教，經常都去教會活動。點解會咁？因為有啲人就係會「一冇嘢做就會胡思亂想」（原來係真㗎），有啲問題諗唔通就唯有去信教，交託神。自從信教之後，我跟她談什麼問題，她都交了給神，例如：選什麼中學？她答：「只要是基督教的就可以了，神自有安排。」

所以，唔係人人都應該留在家帶孩子的。

附網上文章：

作文的題目叫做《我的媽媽》，稚嫩的字體這樣寫到：

我的媽媽不上班，平時就喜歡打牌和看腦殘的電視劇，一邊看還一邊罵，有時候也跟著哭。她什麼事也做不好，做的飯超級難吃，家裡亂七八糟的，到處不干淨。

她明明什麼都做不好，一天到晚光知道玩兒，還天天叫累，說都是為了我，快把她累死了。和我一起玩的同學，小青的媽媽會開車，她不會，小林的媽媽會陪著小林一起打乒乓球，她不會，小宇的媽媽會畫畫，瑤瑤的媽媽做的衣服可好看了。我都羨慕死了，可是她什麼都不會。

http://babyonea.com/4067/

那些年，自己選校的中招經過

我寫了「田忌賽馬選中學方案」，有朋友睇完都唔係好明，因為人人都是力求向上，希望盡力考高一級，為何要選低少少呢？這個建議和我個人的成長經驗有關。

那些年，我阿媽係乜都唔識的師奶，選中學當然係我自己揸主意，而我就當然係聽老師講，老師話，本區最好的中學係XX官立中學，我就選填了，因為我當年小學係全級第三名，真是俾我卜中咗，學校有三個人填這間B1a中學，有兩個入到，其中一個係我，另一個中獎的是細孖，細孖年年考第一，所以都中咗。但大孖年年考第二，唔中（可能隨機號碼唔夠我靚），入咗一間B1b中學。孖仔的媽媽為了孖仔可以一齊讀書，將細孖降去那間b1b中學，我自己一個人讀那間b1a.

我上了那間band 1a之後好唔開心，因為以前名列前茅，上了中學竟然考百幾名。最唔開心的是學習困難，因為我那間小學的英文水準低，阿媽唔識英文，其實我每一個英文字都係從學校學回來的，又冇補習，咁點會叻先。上了中學，課本全英都算，阿爸買了部電子字典給我，免強應付到，但上堂聽唔明最大鑊！試過上reading堂，老師講故事，我一句都聽唔明，啲同學仲要笑，我又唔知人地笑乜，那感覺超難受。

英文其實唔難學，但我從小零接觸，那個年代，連英文卡通都冇得睇，人地同學生長在中產家庭，起碼睇過sesame street, 我真係冇家庭支援。

最衰都係我p型的性格，p型係好容易適應環境的，過了一年，我適應哂，我已經習慣咗自己考百幾名，上上落落都唔係咁在意，開始冇乜心機讀書。我父母又完全唔理我啲成績的，考過八十幾，升了都冇讚，跌了又唔抦，中學就咁混混沌沌就過咗。回想起來，中學乜都冇做過，像學校中的一個隱形人。

而那邊箱，讀b1b的大孖細孖最後都入了大學，其中一個仲讀醫添！

有時真係很責怪我阿媽，完全沒有提供任何協助及援助，心靈情緒支援都冇，佢日日都在家唔知做乜，混混沌沌過日子，連飯都煮得難食過人。佢四十年如一日完全冇進步過！當我網上看到「我媽媽就是一個沒用的中年婦女」這一篇作文時，我真係身同感受，笑咗出來。笑？係，苦笑。我都唔怪得佢，佢智力低都係天生的，她父母也沒好好教育過她，她又怎會聰明？佢都係一個受害者。

人生，如果有智慧，條路就會好走。像田忌賽馬的故事，道理其實很簡單，但為什麼田忌的對手就沒有想到呢？

報考低少少成績的中學，令小朋友可以用正常力量就考到中上，加培努力就名列前茅，這樣，不但學習的意欲高，也有輕鬆的課外閱讀時間，涉獵更廣泛的知識。考高了半級，同學勁，孩子就要用盡自己的精力去保持成績，生命都埋葬在課本之中。最後到了公開考試，都唔係考課文！就如通識卷，考的就是你沒法準備的廣闊知識層面，目的是杜絕高分白痴進入大學體制，填補十幾年前的教學漏洞。

讀到一間出名的中學，係令家長很有面子，但對孩子本身並無太大好處。當年我一個細路女識條鐵咩，中招！

相關文章：

田忌賽馬選中學方案

http://curiousboy2016.blogspot.hk/2017/11/blog-post_26.html?m=1

搞清楚因果關係

朋友識一個女人，周圍向兒子的同學的媽媽借錢應急，說是要搬屋，資金周轉不靈，結果不少人借了錢給她，大概都每人借出了五位數字吧，我問朋友：「咁你借唔借俾佢？」答案是否定的，我會心微笑。

結果，那個媽媽果然不久失了蹤，借了錢給她的人上她家門討債，佢仔的嫲嫲叫那些人不要再來，這個女人和佢地再無關係了，兒子也不要了。

這是我和朋友預測到的結局。為什麼呢？因為這個女人平時就很大使，一時興起就坐私人飛機，一轉眼就買了一萬元的美容套餐，一時又要買金撈（不知最後成功買了沒有，總之在群組弄得人人都知），她不停炫富，卻根本沒有工作（單親），心思精明的人怎會借錢給她？是否借錢給一個人，是看她有沒有收入，不是看她有多大的支出！

這是很簡單的道理，但那些入世未深的師奶就是不知道，可能錢不是自己賺的，借出去時唔識肉赤。而她們借錢給她的理由是：「我見佢平時好有錢，親眼見到佢好輕易就使咗幾萬元了。」

就是這樣，才不能借呀！

就是大使才會要問人借錢，借給她自然是順手使埋，仲使問咩，就算筆錢用於正途，都係鐵定冇得還。這樣的消費模式，有工作都還唔起，何況冇工作？

但為何有人會覺得大使代表有錢？因為她們見到她身上的名牌，見到她揮金如土，就覺得她很有錢了。其實真正有錢的人通常都不是這樣的，你看看李嘉誠就知道，一套西裝穿十年，一隻手錶只是幾千元；我們認識一個有錢人，連請我們飲茶都等到茶市特價時段；巴菲特平時最愛和老婆去超市搜平貨！就是這種人才會有錢呀！否則像神童輝那樣，金山銀山都被他花光。

這裡想探討的是一個把因果互換的逆邏輯思維。

錯誤：有錢是因，胡亂花費是果。

正確：胡亂花費是因，借錢度日是果。

明白了因果關係，就不會胡亂借錢給人。連財務公司都淨係借錢俾有還款能力的人啦，怎會咁傻，借俾只有花錢能力的人！

性價比超高的意粉

在759買的這個意粉性價比超高。

原產地是拉脫維亞，即是北歐。

很滑很彈牙，比起超市其他貴價牌子，一點也不輸，又易煮，煮過了點時，也不會糊在一起。

咁高質素的意粉，竟然只賣四個幾一包！

有759會員咭再有折，即係三個幾一包，痴線！

愛拌嘴的父子

聽我家兩父子鬧交是很有趣的。

爸：「出門，去公園跑步啦，唔可以偷懶㗎！」

兒子：「公園會爆炸㗎，你想唔想冇咗個仔丫？」

爸：「你估你好叻呀？我同媽咪生過第二個，唔要你！」

兒子：「你一把年紀，唔方生到仔㗎啦~」

爸：「孔子個老豆七十幾歲先生佢，佢又咪咁聰明健康！」

兒子：「You are old and a fool!」

爸：「信唔信我生返半打溝稀你！」

我真係認唔住笑，intj和istj因為大家都係j，所以日日都會嗌交咁滯，雙j對碰，佢地兩個好有火花， 一時糖黐豆，一時水溝油。

最後都有去跑步，因為媽咪爸爸出咗門，唔通佢自己留在家咩，我其實都唔明，我老公總要多費唇舌，我從來都唔同個仔嘈，我行，佢一面反對都係一面死死地氣跟住我，同佢嗌交就「中計」了，all in vain！

田忌賽馬選中學方案

一年多前，曾經寫了一篇「田忌賽馬」，談論關於升中選校的問題：

http://curiousboy2016.blogspot.hk/2016/08/blog-post.html?m=1

我當時的大方向已十分清晰，就是讓自己的一等馬和人家的二等馬來賽，讓自己的二等馬和人家的三等馬來賽，請參看上文。

今日續談，如何知道自己的馬是什麼馬？

如果你的小學是完全不公布派位的，又或者你自己都不被通知個仔/女考第幾的，那完全是一個迷，這篇可以不看了，唯有信老師，老師話你仔係咩馬就咩馬囉，都未必唔準嘅，希望佢唔好搞錯就得了。

我在網上找來了這家有公布派位的學校，cap咗幅圖來向大家解說一下，如何用這些資料進行分析。首先，從名單中選出所有Band 1中學，將數字加起來，至於那一家是band 1中學，上網查下，唔難，只是有啲煩，不過如果你仔小五了，煩都要。

以下這個網站可以幫到手，不過佢只是分band, 冇仔細分到band1a, 1b, 1c之類，而且間中資料有錯，所以鎖定兩三間目標中學之後，再上討論區仔細查閱那幾所中學的口碑，再作最終決定。

https://www.schooland.hk/ss/kwun-tong

再說回以上圖片的那家小學派位，我粗略統計過，大約有90人獲派BAND 1中學，而這間學校每級大約有180多人，即是有一半人入到band 1囉！如果你孩子讀這家學校的，考九十名之前，就屬於B1學生，而九十個band 1學生中，又分b1a, b1b, b1c, 到底有幾多個，又係可以用以上派位圖來統計出來的。因為那家不是我仔的學校，我就不仔細統計了，大家自己拿自己孩子學校的數字來統計吧！

計完之後，假設你個仔考全級45名，而貴校有30人派b1a學校，30人派b1b學校，30人派b1c學校，咁你仔即係屬於b1b學生囉，同老師的說法是否附合呢？如果附合，即係老師冇發夢，資料正確。如果不附，咁就要問清楚老師的資料點計算了，誰知道學校公布的派位結果是真的，還是假的？哈哈…

話說回「田忌賽馬」的選校方案，即是，如你仔係b1b學生，最好你選一間b1c的中學，如果是b1c的學生，選b2a的中學，如此類推。為什麼要向下少少做選擇？因為咁可以確保你個小朋友入了那家中學之後考到中上的成績呀！

如果「高擧」了，唔小心考高咗一級，又「幸運地」（随機number夠靚）派到，真是做硬墊底紙，什麼都可以失去，但千萬別令小朋友失去自尊！年年吊車尾，有邊個還會有興趣學習？一旦失去了興趣，就什麼都學不入腦。

人，最重要的是知道自己的位置，放自己在適當的地方，在自己的本位上做到最好，再尋求突破。

芝麻撈飯撈麵

中國人其實好多唔飲得奶，例如我同我99, 咁日常飲食，就要刻意補鈣。99話鈣片梗胃，於是佢惟有食多啲芝麻，芝麻是含鈣最高的食物。

我們的吃法有：

芝麻醬揸麵包

糖炒有機芝麻

（係好好食，但我怕肥，老公就勁鍾意食）

我覺得撈麵或撈飯最好，又香，又唔使加糖，唔肥。

飯餐餐要食，將炒香的芝麻用玻璃瓶裝住，裝好飯後加啲在飯面，又好吃，又有益。

相關文章：

不能偷吃的零食

http://curiousboy2016.blogspot.hk/2017/11/blog-post_14.html?m=1

華語歌手：莊心妍

我老公成日都聽這個叫莊心妍的歌手的歌，為什麼會開始聽呢？因為佢在國內的收聽排行榜成日都佔據高位，經常排在在鄧紫棋（我們家的偶像）前面，於是他便好奇起來，一睇都幾醜樣，唔使問，一定好聽，否則應該早被淘汰掉了，wakaka.....

老公成日播，我開始熟悉佢的歌，發現真係很耐聽，越聽越好聽，她的聲音很厚，有少少沙，歌曲是悲情加激昂，旋律很不錯，易上口。我的品味是比較大眾化的一類，喜歡一些易上口的旋律。

推介以上這隻碟，我覺得冇乜邊首唔好聽囉，我最怕啲得幾首好聽的碟，因為要聽聽下轉台麻煩，這隻可以一面開住一面做嘢，唔使轉，我而家一面聽，一面寫了這篇blog。

英文字咭方案

阿仔啲英文停滯不前咗幾年，又係時候push下佢，否則佢中文會獨大，失去平衡力。這件事我想做許久，但又不知如何入手，結果有日見到「那些年，和我一起閃咭的靚媽」在Facebook曬佢女常識科的温習咭，我叮一聲，決定「 重施故技」！我同阿仔單聲先，話俾佢知媽咪做閃咭俾佢學，佢哈哈大笑，說：「媽咪，你當我係BB咩！」

第一批字咭做好了，想不到效果咁好，阿仔好鍾意學，佢仲要每學一個字，自己試作一句去應用，但作來作去都係Thomas卡通的內容！

閃咭應用在嬰兒身上是極具爭議性的，但應用在兒童身上，完全冇爭議性。兩母子嘻嘻哈哈地學着，我show咗十幾張就停，阿仔話佢仲要睇，迫住我立即又做多一批。唔知咁嘅好勢頭，可以持續幾耐呢？

暫時字咭內容是在網上或Facebook的學英文平台搜尋回來的。首批是這些：

Beautiful這個詞彙用作稱讚別人漂亮，是香港人經常會用到的，但如果想表達「明艷照人」、「美得令人窒息」、「如天使般美麗」等等，這個簡單的詞彙就不足以表達了，原來表達「美麗」的英語詞彙還有很多:

1. alluring (誘惑迷人的)
2. angelic (如天使般美麗的)
3. bewitching (美得令人如痴如醉的)
4. gorgeous (令人心動的)
5. lovely (可愛迷人的)
6. stunning (美得令人窒息的)
7. beauteous (美麗的) [多用於書面語]
8. sublime (高貴氣質的美麗)
9. adorable (討人喜歡的)
10. cute (嬌小可人的)
11. dazzling (閃亮動人的)
12. graceful (典雅的美麗)
13. nice (親切而平易近人的)
14. exquisite (精緻優美的)
15. enticing (誘人的)
16. appealing (有魅力的)
17. fantastic (美得令人難以置信的)
18. radiant (明豔照人的)
19. fascinating (美得令人神魂顛倒的)
20. charming (魅力四射的)

***
變態:
Sick
That's pretty sick！

鬼唔知咩!
No shit！

發顛:
To lose it！
He completely lose it when he learned that…

好鬼熱:
It's boiling!
It's scorching!
It's baking hot!

人不可以貌相:
As saying goes，
Don't judge a book by it's cover！

熬底:
Shit oneself!
Don't shit yourself, just go to talk to her！

邊有$呀?!
I'm not made of money!

以為:
Thought(一定要用pass tense)
I thought that he was a nice guy.

一早就知啦!
I knew it.

明目張膽
He did it in broad daylight!

無野下你?
Are you mental？


大家實在太喜歡用 “very” 這個字，幾乎時刻聽到，天天見到，例如：very big, very beautiful, very cold, very easy, very fat 等等。但是由今天起，可以「停一停，諗一諗」，還有更多更好的選擇…

1. very little – tiny
2. very tasty – delicious
3. very angry – furious
4. very afraid – terrified
5. very hot – boiling
6. very cold – freezing
7. very big – enormous
8. very dirty – filthy
9. very clean – spotless
10. very clever – brilliant
11. very weak – feeble
12. very beautiful – gorgeous
13. very careful – cautious
14. very clear – obvious
15. very detailed – meticulous
16. very deep – profound
17. very easy – effortless
18. very fat – obese
19. very hungry – starving
20. very tired - exhausted

「擴建」英語詞彙？　#3  Word + PROOF（Suffix後

Proof 是一個頗常見的Suffix（後綴），事實上，proof 這個Suffix在購物時可大派用場，例如冬季買羽絨時要留意衣服是否windproof（防風）、買手機和手錶時要留意是否waterproof（防水）等等（但要注意的是waterproof是完全防水，比water-resistant「耐水」更嚴謹）。Proof 還有很多其他常見的組合，譬如：

1.   bulletproof（防彈）
2.   dustproof （防塵）
2.   rustproof （防鏽）
3.   rainproof （防雨）
4.   waterproof （防水）
5.   heatproof （耐熱）
6.   windproof （防風）
7.   fireproof （防火）
8.   childproof （對小孩安全的，也可作動詞用）
10.  ovenproof （焗爐適用）
11.  theftproof  (防盜)
12.  foolproof （防蠢材，即「萬無一失」的意思）

這些詞彙既常見又實用，就好像如果你想表達：
• 「雖然最新的手機能防水，但它絕不防火。」英語應該怎樣說呢？
Even though the latest cellphone is WATERPROOF, it isn’t FIREPROOF.
• 「我們把刀和藥物鎖在櫃子裡，令家變成一個對小孩安全的地方。」又該怎樣表達呢？
　We CHILDPROOFED our home by locking all the knives and medicine into a cabinet.
• 再例如你想表達「這世界沒有萬無一失的謊言，因爲遲早會被發現。」該怎麼說呢？
There’s no FOOLPROOF method to tell a lie because you’ll get caught sooner or later.

Proof確是個很實用的Suffix（後綴），所以從今天起，大家可以利用這個「後綴」來擴闊自己的詞彙「界限」：譬如「防通脹」(inflationproof)、「防老」(ageproof)、「防淘汰」(futureproof)等等。 那麼想想看，「防狼」可以是wolfpr

Smile是「微笑」，而laugh是「大笑」，這兩個詞彙大家都很熟悉。但如果想在不同的情景表達「笑」，例如在演唱會中「歡呼大笑」、在朋友出洋相後「瘋狂取笑」，又或者在玩過山車時「尖叫大笑」，都有不同的表達方法，以下10個關於「笑」的詞彙，你又認識多少呢?

1. giggle /ˈɡɪɡəl/ (咯咯地笑，例如在上課時看到老師出洋相情不自禁地笑)
2. grin /ɡrɪn/ (露齒微笑，可用於與別人打招呼的時候)
3. chuckle /ˈtʃʌkəl/ (暗自發笑，尤其在看書時看到一些有趣的內容)
4. beam /biːm/  (眉開眼笑，例如在叱吒頒獎禮上歌手得獎的時候)
5. sneer /snɪə(r)/ (冷笑，例如在看別人不順眼的時候)
6. chortle /ˈtʃɔːtəl/ (幸災樂禍地大笑，通常因別人的不幸而大笑)
7. guffaw /ɡʌfˈɔː/ (瘋狂大笑，例如看見朋友做了些愚蠢的行為)
8. shriek /ʃriːk/ (尖叫大笑，例如在玩過山車時)
9. cackle /ˈkækəl/ (高聲大笑，例如一群朋友在高談闊論時[通常較刺耳] )
10. whoop /wuːp/ (歡呼大笑，尤其在演唱會中表示興奮的時候)

Q105. 想知道到底是Makeup還是Make up？Makeup artist還是Make up artist？期待你的解答，謝謝！
(Question by: TT Chui)

TT，你的問題很好，只是抱歉Prime English至今才回覆你的疑問！Makeup或Make-up連在一起使用時，是一個「名詞」，而其中一個常用的意思是「化妝品」。 因此，「化妝師」的英文可說為makeup artist ✓或make-up artist ✓， 而絕對不可把make和up分開，寫為make up artist ✗。

一般分開來拼寫的，都作為「動詞」用。 而make up，正是「片語動詞」（phrasal verb），它擁有不同的意思。而以下10個是最常用的：
1. make up a story（說謊）
2. make up after a fight（和好如初）
3. make up for a mistake（補償過失）
4. make up one’s mind（拿定主意）
5. make up the difference（湊夠數目）
6. make it up to someone（向某人補償贖罪）
7. make someone up ( 替某人化妝 )
8. make up for lost time ( 抵償失去的時間 )
9. make up a bed ( 準備牀鋪)
10. A makes up B (A組成B)

總括來說，分開寫的大多是「動詞」，而連在一起的則是「名詞」，不過要留心，名詞內重音通常會放在第一個音節。


形容「天氣炎熱」：
1. melting (廣東話：「熱到飛起」)
2. boiling hot (熱到發滾)
3. hot as hell　(廣東話：「熱到死」)
4. smotheringly hot　(熱得喘不過氣)
5. soaked with sweat (汗流浹背)
6. sweltering (酷熱難耐的)
7. sultry (濕熱的)
8. baking (酷熱的)
9. stifling (悶熱的)
10. sizzling (火熱的)
11. roasting (熱得像火爐似的)

形容「陽光猛烈」：
12. scorching sun　(烈日當空)
13. abundant sunshine (陽光充沛)
14. the torrid heat of summer (炎炎夏日)
15. dazzling sunshine (猛烈的陽光)

其他與「熱」有關的詞彙：
16. beat the heat (消暑)
17. heat stroke (中暑)
18. hot spell (持續高溫的天氣)
19. Very Hot Weather Warning (酷熱天氣警告)
20. fry an egg on the sidewalk (慣用語：「熱得能把雞蛋煎熟」)

睇電影代替睇書

上次話要俾阿仔睇多啲電影，於是我就上網揾電影啦，點知好多電影都要付款，尤其英文電影，真係奇貨可居！

由於一部電影都幾長，我仔係唔可以睇到一半停的那種人，我唯有轉為揾卡通電影，因為會比較短，而且啲英文容易聽好多。

我仔最鍾意係Thomas電影，你只要打Thomas movie, 就有大量供應，我們睇了成個禮拜都睇唔哂。我們是吃飯時間看的，大約每次播一小時，就算吃完飯都可以睇埋先開始做功課。

阿仔好開心，佢真係好鍾意睇Thomas電影，佢話電影比電視好睇好多，佢覺得個故事完整啲又精彩啲，本人完全唔覺得有咩分別，不過而家啲Thomas電影，竟然有歌劇形式，我都覺得幾精彩。睇完佢仲會同我談論下內容，可見佢真係鍾意到不得了！

呢啲Thomas電影全部冇字幕，但阿仔一啲都唔介意，佢話睇和聽得明九成，我都覺得唔出奇，因為我都明咁上下。Thomas的內容套路都差不多，我地都估到七七八八啦，再加畫面及英文，明九成唔奇。

其實我仲揾咗fireman sam, mr. Men and little Miss, Frozen, 等等，但阿仔太喜歡Thomas, 就一直睇住先，睇哂才轉吧！

我覺得睇卡通學英文真係比睇英文書有趣好多，英文因為不是母語，我們接觸少，真是要keep住日日有一小時接觸先得，否則會聽唔明的。

學什麼語言都好，第一步要聽得明，第二步是看得懂，第三步是說得出，第四步是寫得好。

英文特別易學，因為聽得明就很容易睇得明，它是拼音文字。

學英文，一切從聽開始。

相關文章：

睇多啲電影

http://curiousboy2016.blogspot.hk/2017/11/blog-post_11.html?m=1

自尋煩惱終極版本

資優學苑正式邀請我兒子做會員，經校方轉交了表格給我，我只要登入確認，便可以參加面授課程。學校負責的課程主任老師打電話給我，我順便問她為何我仔沒收到今年學校網上資優功課的Login and password, 才知道老師怕我仔辛苦，自動幫我cancel咗學校的網上資優功課。但佢明明問過我要不要，又叫我打去資優學苑問可不可以兩樣都參加，我又已經個多月前確認是可以兩樣都參加，並已email負責老師，通知她我仔會參加，她們還是要cancel我仔的名額？真係莫名其妙！

於是，我再告訴主任老師：「我仔有興趣參加。」老師迫於無奈再作安排。第二天老師打來，說了一大堆話，叫我考慮多幾天，我問她是否沒有名額? 她說大把名額有剩（這間學校的人一向對網上功課不熱衷），咁我就話：「你唔使俾幾日我考慮，我會參加，我好清楚自己做緊什麼，你放心。」

「妾非在夢中，君乃在夢中耳。」我心中吶喊。

看官可能以為好奇媽佔用了學校資源，所以老師想取消我兒子的資優功課，告訴你們，不是這樣的，資優功課五門共有七十五個名額，非常足夠，而且大部分學生已忙得人仰馬翻，誰都不想跟我爭。至於課程主任老師為什麼跟我糾纏呢？因為她「擔心」呀！擔心我迫個仔啩（難道我的樣子太像虎媽？），縱然已呈交證書證明我仔智商有141，佢都係唔明141和100的分別。如果覺得網上學習吃力的，就不是資優兒了！

她為什麼就沒想過，我仔真係應付唔到，我可以「放棄」的呀！都唔使錢！又冇害任何人有任何損失，我開通了路徑，有了資源，我可以自己決定做唔做㗎！唔得閒我咪唔做囉，完成唔到冇任何罰則㗎！你又可能話「係咪老師怕你完成唔到，學校冇面？」你又想多了，因為大部分人都係完成唔到的，多一個唔多。

咁點解老師唔俾我仔做呢？因為佢係isfp囉！佢每做一個決定多多擔憂，柔腸百轉，經常自尋煩惱。我早前叫個isfp朋友去康文署一齊抽個活動來玩啫，免費的，佢又打電話去了解個camp去邊度沖涼，有冇乜乜設備.....天！抽到先問啦，佢又話抽到唔去又唔好意思浪費了正苦資源，天！康文署是傻的嗎？後補名單都幾十個，你阿姐唔去大把人爭住去。她做一個「按個掣」的決定搞咗一兩天，然後大家都抽唔到，咁就浪費了兩日，以後都懶得叫佢抽獎了！

「自尋煩惱」是isfp的特色~唉～

名畫失蹤事件

99有6兄弟姊妹，大哥最聰明，是數學奇才，而且音樂也很有天份，中學時偷了學校琴室的鎖匙去配，自己夜晚在琴室練琴。他從來沒有受過音樂訓練，但聽過的交響樂都記得，自己把譜默出來再演奏，我99都有相似能力，但差幾十皮，只默到一般歌曲。不過天才總是怪怪的，他不懂與人溝通，大家都認為他有自閉症。

父親死後，遺下一堆古董，有一天，大哥說見到大姐個仔入去書房找過東西，暗示有人偷東西，於是大家都一人一把鎖，把書房上鎖，以防寶物被盜。

父親喪事辦妥，大家點算家財，將古董抽簽，抽簽時，99已問了許多次：「那幅xxx名畫在那裡？」大家都找不到，心裡懷疑是大姐的兒子偷了。

二十多年後，大哥有一日忍不住向小弟炫耀自己的收藏，拿了那幅名畫出來，說是自己當年好彩抽中的。小弟有日又同家姐講起，即係我99。小弟唔記得，但99記得清清楚楚，當年這幅畫是失蹤的。真相大白！

我同老公聽完整件事爆笑咗出來，老公說：「你地五個先至係自閉症，仲話人地自閉症，俾人玩咗二十年都懵下懵下！」

當所有人都還如在夢中時，大哥已早早推算到最後會分家產，早有部署，先將最值錢的東西拿走（可能一幅抵過其他所有的總值），再製造一個嫌疑人，神不知鬼不覺地把財產弄到手。可見其預測力，計算人心的能力皆是眾人之首，到底誰有自閉症了？

自閉症意思是腦損傷，沒有了理解抽象事物的能力，因此經常產生誤會，導致不能社交。好明顯，大哥係費時同你班蠢人溝通，唔係唔識溝通啦！計謀超卓，點樣自閉法~

出盡全為餐飯咋

幾年前進行早教的時候，我都有勸我的閨蜜一齊做，但有這樣的反應：「我又唔係想個仔/女做咩大事，只要佢將來生活到就算啦！」

其實我的目標同佢地係一樣㗎咋，我唔係想個仔做偉人先做早教㗎，當然，如果佢唔小心做咗偉人，我當然開心啦。但係我出盡全力，都只係為咗佢將來有份正經工作，有餐飯食，唔使我養佢，就係咁咋！

世界上有人以為自己出盡全部財才物力，孩子就會光芒四射，我見過有人買幾千蚊一套單車衫俾個仔穿，生活用品都極盡奢侈，佢話：「佢用慣好嘢食慣好嘢，將來自然會努力讀書，努力工作，自然會有成就㗎啦！」佢仲勸我要多啲「投資」在個仔身上，快啲轉間學費貴的學校，個仔先會有前途。我當時完全不能理解，到底奢侈同成就有咩邏輯上的關係？？？我而家學了16型人格，我就明，佢其實根本冇邏輯，只係個人太膚淺。

又有人以為只要能拉拔長大的人就一定能讀到大學，原因係「我三個仔都讀到大學」，所以佢啲孫自然讀到大學啦！呢啲又係冇隨時代進步，當年人人都係求其拉拔長大就算，你好彩！啲仔入到大學，今時今日，人人都努力培養孩子，你仲用三十年前嗰套，真係吃不完兜着走。

又有一批人，以為自己的孩子一定會後來居上，今日先玩玩玩，食食食，有一日個仔就突然發力，發力後自然成就輝煌！我99就係咁諗，書唔好睇（壞眼），練習唔好做（辛苦），多休息，開心成長，有一日就會後來居上，而家考第一都無意思的，而家差將來先會成績好。不過，佢兩個仔都冇後來居上喎！點解佢深信個孫會呢？我都唔明。

其實世界上，真係好多人唔明「一分耕耘一分收獲」的道理㗎！仲有一批人係冇因果邏輯的，想要收成菠蘿，但又種西瓜。例如「食得好嘢多自然揾錢多」，呢啲就係奇怪的邏輯，「食得好嘢多自然使得多」才對呀！然後她們又認為「使得多自然會揾得多」，咁又係怪，唔通周身咭數的人一定會賺大錢咩！

還有以為自己好叻，將個仔培養得好好，將來個仔一定有成就的人，唔好咁傻咁天真啦！就算你做得幾好，你仔而家年年考第一，攞九十幾個獎，成功都唔一定會光臨㗎！成功有好多因素的，包括運氣。

總論，取法乎上，僅得其中；取法乎中，僅得其下。 即係話， 做父母嘅盡量做到最好， 但係個心你就要預咗個仔只係中規中矩，不過不失， 搵到啖飯食， 餓唔死自己。 父母如果只係做得中規中矩， 咁你就要預咗個仔只係一劈爛泥。 如果父母一塌糊塗， 就唔使講啦！

如果父母做到一塌糊塗， 但係個仔飛黃騰達， 咁就恭喜曬啦， 六合彩咁難中都總有人中嘅！

煎魚香脆的秘密

到底如何才煎到一條香噴噴，脆卜卜的魚呢？

答案係一個字：乾！

水份是香脆的敵人，所以魚身的表面，在煎之前一定要確保乾爽。方法是，先用厨房紙吸乾，擦上鹽，放在雪櫃一兩小時，這樣表面的水份應該很少了，再擦点生粉，像下圖。

鑊要起油紋才代表夠熱，夠熱才把魚放下去，急不得。

把魚放下之後便收細火慢火煎魚，煎魚一定不能猛火，否則外面燶哂，裡面未熟，咁就弊！煎魚和煎牛排是相反的，因為牛最好裡面唔熟外面熟，魚一定要全熟，要離骨。

香脆煎馬友搞掂了！

香煎黃花魚，又得！得咗。

P.S.呢個餸都係考耐性的，又係唔分得心㗎，否則咩方法都一樣會燶㗎！

睇「詞靈」速度紀錄

等了許久圖書館終於有得借，阿仔前日放學竟然做哂功課，有時間看書了！

我見他開始看，就知道他會一口氣看完，因為其他博友的小朋友都話好好睇，我仔的性格，好睇的書停不下來的。

於是我決定計下時，做個記錄。拿來了計時器按開始，他已經看到20頁了，所以由20頁開計，完結時間是94分27秒。

開始的頁數。

完結的頁數。

一分鐘看1484字。鄭才千是一分鐘三千字，理解記憶率是98percent, 阿仔大把進步空間。

注意，書本越有趣，閱讀速度越快。如果俾本字典小朋友應該一世都睇唔完。

相關文章：

閱讀速度與理解相關嗎？

http://curiousboy2016.blogspot.hk/2017/09/blog-post_7.html?m=1

如何知道閱讀量

http://curiousboy2016.blogspot.hk/2017/07/blog-post_33.html?m=1

年輕人眼中都是牛屎

昨日李飛演講，仲要求全港中學直播，我一面睇一面覺得這個做法冇任何作用。中學生已經係反叛年齡，仲要叫佢地愛國，就好像叫人由著Nike球鞋改為穿國產白飯魚一樣，咁唔型！果然如我所料，生果日報同明報唱衰就一定㗎啦，網上啲年輕人群組當然都係大唱特唱啦！反共勢力更加吱吱歪歪的，愛國其實真係唔型囉，年輕人最重要係乜呢？就係同學點睇你囉！有冇聽過香港年輕人追國產明星呢？要追都係追韓星，本港明星，甚至外星啦。

唔好話愛唔愛國呢啲高層次嘢，現代年輕人連基本人類應有的尊重長輩都未識啦，我成日在名校Secrets群組，見到啲年輕人話老人家排隊打尖，倚老賣老，又有人話唔想讓座，但俾啲老嘢迫。唉！我冇實際在現場見到，我唔知個老人家有幾乞人憎，我亦不想評論誰是誰非，但我覺得你在網上公審，又明知老人家唔識上網，冇仇報，係一種網上暴力囉！

我活了幾十年，都未同過親人以外的老人有拗撬㗎（親人之間有拗撬反而是平常家事）。街上的老人都係和靄可親的，我都成日「慢慢行，唔使急」咁掛在口邊，無嘢嘅，你自己心境係點就係點㗎啦！

有個蘇東波和佛印的故事，蘇東坡說佛印像牛屎，因為他自己的心中只有牛屎，佛印看蘇東坡像佛，因為佛印心中有佛。香港年輕一代，看什麼都像牛屎啦！

當然，呢個世界實有大好青年嘅，不過少啲囉！都未見過佢地出聲咁囉～唔好話發帖發文，連回應留言都冇囉~

故事：

 苏轼是个大才子，佛印是个高僧，两人经常一起参禅、打坐。佛印老实，老被苏轼欺负。苏轼有时候占了便宜很高兴，回家就喜欢跟他那个才女妹妹苏小妹说。 
    一天， 两人又在一起打坐。苏轼问：你看看我像什么啊？佛印说：我看你像尊佛。苏轼听后大笑，对佛印说：你知道我看你坐在那儿像什么？就活像一摊牛粪。这一次，佛印又吃了哑巴亏。 
    苏轼回家就在苏小妹面前炫耀这件事。 
    苏小妹冷笑一下对哥哥说，就你这个悟性还参禅呢，你知道参禅的人最讲究的是什么？是见心见性，你心中有眼中就有。佛印说看你像尊佛，那说明他心中有尊佛；你说佛印像牛粪，想想你心里有什么吧！

被小傢伙綁架了人生

阿仔出生前，我同老公傾過教育方向，我們出奇地一致，我們認為孩子只要健康平凡已足夠，我們會將他粗茶淡飯地養大，他只要將來能養活自己就好。

怎料阿仔出生後，我發現唔對路，我們一家對他的愛是與日俱增的，吃最好最鮮味的，穿最滑最透氣的，我們一家三口全部重心都傾向了他，所思所想都是他，最後連那個不好的工人都睇唔過眼，炒埋，自己辭職去湊，我當時人工都幾高㗎，交標準稅率。

於是，我開始胡思亂想：如果有一日失去這個孩子，我會怎樣？

然後我發現是難以想像的，根本可以用「活不下去」來形容。我每天都會在思念之中痴痴呆呆，如果生死未卜（俾人捉咗），我就像入無間道，生不如死。所以，我這樣随性的人，一出街，眼睛都是緊緊盯住個仔，唔見十幾秒都會嚇到死死下，直至有六七歲，才稍為放鬆，到現在九歲了，我終於會給他自己上洗手間，我在遠處等之類。有時見到比我仔還矮一個頭的孩子在街上行走無人陪，我知又係那些要訓練孩子自理能力的爸媽做的事，又或者完全冇能力冇時間睇住個小朋友的人做的事，我心想：我真是輸唔起，就算被人話我直升機阿媽，我都係要管接管送，唔到中學/我咁高，我都唔敢俾他一個人在街行來行去。（看走勢，他至小六會和我一樣高了，有保護自己的能力了！）

就這樣，我們的人生，就「意外地」被兒子綁架了！（孩子到來不是意外，但為了孩子，牽一髮動全身，實非意料之內的事）他的身體狀況，他的情緒，他的學業，他的前途，每樣都牽動住一家人的心。然後我又發現，如果想安享晚年，個仔都唔能夠擁有太衰的人生，否則根本就食難安，坐唔落。莫非個仔日捱生捱又結唔到婚，又或者在家打機啃老過日子，我們還能若無其事去飲杯茶，食個包嗎？根本是不可能的事嘛！

不害怕英文

我英文不算好，但我卻沒有恐懼感，我不恐懼自己學不好英文，更不恐懼兒子學不好英文，為什麼呢？

原因是：英文只是我們的second language.

我在圖書館找來了DSE的pass paper來看，發現香港教育局對我們的英語要求只是second language的程度，並非first language. 英文唔夠人咁「 嘞嘞聲」，絕對不會無書讀，DSE也未必低分。只要到達正常應用的水平中的高水準就夠了！

什麼是正常應用的水平？就是能夠與外國人溝通對話，正常表達自己的意見，但無須深入靈魂交流；能夠用英文寫email，寫essay, 沒有重大的文法錯誤，但無需讀懂沙翁的十四行詩，無須了解英國人的深層次文化；能夠看得懂英文報紙及英文課本，但無須看得懂高層次的英文小說。

只要拿一份DSE的English Language試卷來看看便知了！不要拿錯English Literature啊！讀得英國文學, 考評局的要求又是另一層次了！不過我仔的個性，一定唔會選讀英國文學的，我不去研究了，有興趣的博友自己去借來研究一下。

講老實，如果不是去到first language的程度，只要與英文保持接觸率，唔會差得去邊。很多英文差的人是一見英文就避開的，第一步要做的是主動接觸英文。例如看英文節目，英文電影，看英文報紙，聽英文歌。

要做到以上的接觸率，其實都唔難，最近大家都見到我有英文歌手的推介，先唔好抗拒聽英文歌先，然後我會推介一下其他英文影片，講明先，我只推介我仔喜歡的，你自己的孩子喜歡什麼題材，自己去找找。

PS.要達到外國水平的各位，可借SAT和雅思的pass paper自己研究一下。

超媽11：別替人家教孩子

我一直唔想寫esfj型的爸媽，因為我很怕他們，我唔知讀者有幾多個係esfj, 唔想得罪人。戴定頭盔先，我討厭的唔係所有esfj, 係發展不良的esfj。

Esfj中文叫保護者，如果用個形象化的例子，佢地似胖虎，胖虎是怎樣的？順我者昌， 逆我者亡。胖虎最愛自己阿妹，如果邊個蝦佢阿妹，他會飽以老拳，無論誰對誰錯。就咁睇，胖虎都唔錯啊！點會唔錯？除非你係佢阿妹囉，否則他便是一個很難頂的人，完全唔講道理。

他們最大的問題是多管閒事！你完全唔識佢，同佢大纜都扯唔埋都好，他就是要來管你！但係佢地佔人口都唔少，而且很喜歡做老師（ 名正言順去管人），想避都避唔到。

前幾日去會所打針就遇到一個。當時我仔打完針玩緊電腦，佢想研究如何調節螢光屏，但手又短，枱又長，於是睇落有個錯覺是他在搖動電腦的monitor。突然有個大叔大呼小叫：「你再搖個mon，我就報警！」我仔就開始和他對抗起來，小孩子當然唔知點切中要點為自己 辯護，我立即上前處理，發覺個癲佬根本係咁鬧人，冇興趣了解事情的真相， 佢哋就係只會相信 佢哋自己睇到嘅嘢， 唔會覺得事情背後仲有另外一啲嘅原因，佢哋永遠都唔會覺得自己係誤會咗人哋。

然後，我為咗停止佢發顛，唯有同佢對罵起上嚟，我簡單直接咁話：「 個小朋友係我嘅， 有咩事你可以向我投訴， 由我嚟鬧佢。 如果佢毀壞會所的財物， 你都應該向會所職員投訴， 而唔係喺度恐嚇佢。」 佢就強詞奪理咁話：「 我都有份交管理費， 所以部電腦我都有份！」 最後會所職員聽見嘈吵， 上前調解， 胡亂將佢打發。

其實呢個男人，邏輯真係好有問題， 如果我的孩子毀壞會所電腦， 我自然會賠償，不會對任何人 造成損失，根本成件事就唔關佢事。 佢好明顯係一個esfj, 喜歡膚淺地了解一件事， 然後跟隨自己認為對的方向不停追擊別人。 我上年個班主任就係呢一種人！

Esfj和intj 係天敵，esfj 不能不追擊別人, intj 不可能不反抗。由於前三個碼都不一樣， 證明佢哋所有嘅價值觀都唔一樣， 所以呢兩種人 必定互相對抗。intj因為內向，佢不認同esfj也不會出聲的，但esfj 不能把不滿藏在心中，這是他們的特色， 他們自以為是天神， 每一件事都要由他們來主持公道， 如果你欠缺他們的教導，他們深深地相信，你將來定必沒有好結局。 他們自己的孩子就極力維護，不好好教導，每日就周圍去教人哋嘅孩子。

所以， 當見到今年嘅老師冷口冷面， 不太喜歡與家長交流， 不太喜歡說話， 我個心反而定咗落嚟， 因為呢個老師係屬於i型， 只要係i型， 就算其他三個字母都一樣， 都冇問題。isfj是專管自己的孩子，esfj則專管別人的，相差十萬八千里，因為管的對象不同。 如果其他人要走嚟管我個仔， 我會非常頭痛， 因為本身佢就係一個特別好奇嘅小孩， 無時無刻都搞搞震， 一定不符合乖巧形象。

Esfp 是esfj的鐵粉，他們 的價值觀很相似，窮畢生精力去管別人的事。但由於他們是p，他們不會主動追擊，他們喜歡附和。 例如每次當我鬧緊自己個仔， 就會有一個小朋友/大人走來鋤弱扶強， 跟紅頂白，一起鬧我仔。 他們不管是什麼原因， 總之就是支持惡嗰個， 所以每次老師針對一個小朋友嘅時候， 就會有一班小朋友 幫老師日日欺負呢一個小朋友， 他們的特色是不分是非， 最喜歡做老師的鷹犬，這種性格便是esfp。

Esfp可以避，你罵他們，他們會驚你。esfj不能逃避， 無端端在會所， 三唔識七都會畀佢追擊一餐。 我在網上寫網誌， 都不能用真名， 就係因為esfj遠房親戚會追擊我。 我講了誰壞話，他們會講返俾當時人聽。

看官， 如果你是esfj, 請不要留言給我, 無論你認為我講嘅嘢啱唔啱, 我都唔會覆，因為我怕你地，怕你性格發展得唔好，纏住我唔放。

P.S. 今年班主任係istj, 正常好多。

相似文章：

超媽10：建立一個温馨的家

http://curiousboy2016.blogspot.hk/2017/10/10.html?m=1

不能偷吃的零食

什麼零食不能偷吃呢？

就是這個了！

有機芝麻，我們用糖炒咗，变為小食，不過邊個食，成屋都知，因為太香了，人人都聞到。

雙11前在天貓買的。

個期都好靚喎，九月先收割，咁快就到了我手。

又新鮮又平，十幾蚊咋，不過就細粒咗啲，爸爸話下次訂啲大粒啲貴啲的。

https://detail.m.tmall.com/item.htm?id=37878377295&toSite=main

為什麼數學像是all or nothing？

你有見過人說非常喜歡數學嗎？有，一定有。

你有見過人非常討厭數學嗎？有，肯定有，而且為數不少。

你有見過人說不喜歡數學又不討厭數學嗎？嗯.......好像很少。

為什麼會這樣呢？

我懷疑這是因為數學有「競賽性」特質。

所謂「競賽性」，就是有一方會嬴，一方會輸。我指的一方，不是同學，是指數學和計數者是敵對的。計對了，像是你嬴了那題數，計不對，就像是那題數嬴了你。

多數熱愛數學的人，訪問他們為什麼喜歡數學，他們多數會這樣答：「因為征服咗條數學難題，實在大有滿足感。」

你讀中英，絕對唔會有這種競賽的感覺。去到最高境界，反而覺得同那科語文戀愛的感覺。愛語文，是一種水乳交融的感覺。愛數學，是一種戰勝敵人的感覺。

所以，通常男孩愛數學，女孩愛語文。因為男孩天生好戰，女孩天生愛和平。如果你的男孩偏偏喜歡語文，不喜歡數學，他通常都比較熱愛和平，不喜歡競爭。同樣，如果你的女兒愛數學，可能她是個好勝個女孩。

而很討厭數學的人，是經常被題目打敗的。所以，如果你的孩子很討厭數學，要先給他/她做大量淺題目，建立自信心。還要讚他，一再肯定他的數學天份。

而本身數學叻的，要去比賽，希望增加勝利感。

好騙的孩子最憂心

一個孩子上小學後的課業成績，其實在幼兒期就看得出來。如果你發現你的小朋友很好騙的，要小心了！什麼叫做好騙呢？

例如：

這對父母用旺仔牛奶盒子裝住支藥餵個仔飲，牛奶和藥水相差咁遠，小朋友飲完一定知「不同味」，但孩子沒去尋找原因，而是回應父母：「這好喝！」然後再喝第二口。我就當那支藥很甜很好喝，但他為何可以想都不想：「為何完全不是我平時喝的味道？」他起碼應該要思考。

他爸媽覺得這件事好笑，擺上網分享，我就笑唔出了。到了正式上學，這種小朋友，媽媽要用好大的努力去教，但收獲就不成正比地少。為什麼呢？

1)觀察力
為什麼這個孩子沒有觀察的習慣？人家給他的東西，他看都不看就喝下去，他只為食，但不用腦。精神都放在食物上。

你可能覺得孩子相信父母，父母給的東西自然立即吃，我告訴你，聰明的孩子什麼人給的東西都會先進行觀察，因為觀察是學習的第一步，如果不觀察，就很難會有知識的吸收。

所以，如果你孩子觀察力強，你今日給的食物混合了一樣他不喜歡吃的東西，就算份量少，他都察覺得到，揀出來或不肯吃，恭喜你了，這個孩子難帶，是因為他聰明！他有很強的觀察力，他不好騙。

2) 判斷力
如果孩子是觀察到食物有不同，並提出反對，但被你說幾句便吃下去了，這個小朋友是不蠢的，但他不夠堅持自己。這種小孩要有一個好媽媽，因為他以後其實是靠你導航了，不要給他結識壞朋友，他會變壞的。

幼兒期最討厭的孩子：不好騙，堅持自己。
長大後最省心！因為他一旦走正途，就一直正確下去，只要幼兒期教得他正確人生態度，後面的路易走。

幼兒期最可愛的孩子：很好騙，喜歡與人合作，遷就別人。
長大後最憂心，他如果外向，就容易被帶壞，就算不被帶壞，他也是坐不住好好學習的；他如果內向還好，但就一直要媽媽指導，難放手。

由幼兒去到小學，其實還不算很明顯，因為小學的東西淺，但一去到中學，情況就會浮現出來了！中學的東西，更加需要觀察及判斷。

所以，幼兒期令爸媽覺得自己「教得很好」的孩子，有機會會令爸媽失望，因為初期帶出去一定廣受讚賞，誰不喜歡與人合作的小傢伙呢，尤其老師；而不停帶給你挫敗感的孩子，可能慢慢會好起來，令你喜出望外。

Fidgety behavior得到原諒

Fidgety behavior即係我地唔知點講，但一見到就想打佢一鑊甘的那種行為，例如郁身郁勢，咬筆，隻手不停「初」住一啲嘢，坐沒坐相，一句講哂：樣衰衰。

我老公係一個一本正經的男人，佢自小已舉止端正，所以很難接這些行為。不過阿仔無論做功課定食飯，都有fidgety behavior, 搞到我老公成日火噴噴咁，我做阿媽當然係貫徹「慈母多敗兒」的風格，成日都叫我老公冷靜啲，並說：「個個男仔都頑皮，睇開啲。」好在阿仔係男仔，否則連性別都冇得賴！仲有， 慶幸阿仔睇書坐得非常定，否則連媽咪都懷疑佢「有病」。舉個例：小明是一個盲人，但只要一見錢佢就會開眼，什麼都看得見，那到底小明是否盲人呢？答案當然是否定的。小朋友有fidgety behavior，不一定是有病的，有時只因為他太悶，好奇心未得到滿足，如果一本好書（留意是他覺得好的書，不是媽媽覺得好的啊）能令他坐定定，就表示他沒有病，他只是太無聊。

自從做了智力測驗，心理學家向老公解釋過阿仔已經係資優兒之中，fidgety behavior算比較少的一個，老公才開始原諒阿仔。有時覺得，做評估還是需要的，起碼阿仔終於得到諒解了，否則老公依然係話我胡亂為兒子開脫。世上總有很多人，書又唔睇，知識又唔吸收，知少少就亂咁話人的人，我老公係其中一個。

不過有fidgety behavior的不一定全部都係資優，資優兒也不是全部都有fidgety behavior。

「阿媽係女人，不等於所有女人都是阿媽。」我經常舉這個例子說明世事的複雜性，因為實在見得太多人犯這樣的邏輯錯誤，最常犯這錯誤的是老師，因為她們最愛知少少就扮代表，只要是有fidgety behavior, 老師都會告訴你什麼是adhd。

今朝在Facebook見到有人分享 Bill Gates的一篇報導，分享者認為Bill有阿氏保加徵狀，我好奇click入條link睇下，發現內文只是說Bill不太懂和人相處之道。

我都唔知幾時不懂和人相處和叻就等於阿氏保加，唉！都係果句阿氏保加的人叻又有社交問題，不能代表叻加社交有問題的人就是加氏保加囉！陳大文係你老豆，唔通陳大係你三分之二個老豆咩！麻煩世人唔好咩都對號入座至得㗎！

睇多啲電影

最近打算由睇書轉為俾阿仔睇多啲電影及電視節目，太小的小朋友睇電影其實係一知半解的，睇書有得按程度來睇，但睇電影的程度有一定限制。如果睇五光十色的卡通片，對小童有不良影響，所以年齡太細還是不要看太多電影的好。由於我仔已經大個仔了（九歲），他睇電影是睇得明白它的內容的，所以可以睇多啲電影了！電影的好處是有聲有面孔，我想兒子多看人臉，多聽不同語言，所以來緊會俾佢睇多啲電影或電視劇。

前天剛剛看了一套印度電影，叫做「心中的星星」：

內容講一個有讀寫障礙的小朋友被同學，老師和家人誤解，最後，好在千里馬遇上伯樂，得到一個好老師的幫助，發掘咗佢的繪畫天份。故事想帶出「天生我才必有用」。

前日就睇咗「雷神傳奇」第一集（ 在mytv super睇）。阿仔目不轉精咁睇，本人就不住分心，魔幻題材，無論係中式魔幻還是西式魔幻，都不是我杯茶！不過阿仔都唔理有冇人陪佢睇，縱然嫲嫲和爸爸在一旁勁傾偈，佢都如如不動，自己好專心咁睇咗接近兩小時。

Coming soon：

今天睇下有冇時間睇埋這套，這套比以上兩套都好看多了！內容幽默有趣，又非常有意思，也是相關教育的。這個故事想指出：「天生我才必有用，請讓我把我的志趣成為我的主修科目，請讓我的志趣成為我的職業。」

YouTube經常有「x分鐘看完XX電影」的短片介紹，我覺得非常有用，因為一早知道故事大岡及結局，咁就唔使自己睇一次先知套片適唔適合小朋友睇。有時故事是好的，結局太慘就要等大啲才看，孩童的積極人生觀，還是應該要被保護的。例如「 人工智能」 這部電影，雖然好啱我個仔睇，但係結果太悲哀，所以都唔夠膽畀佢睇住。

例如：

後記：終於抽到三小時時間睇了「三個傻瓜」，阿仔非常投入，很喜歡這個故事，印度人五官分明，完全冇認角色的問題。阿仔今晚真是很開心！

越自由越吸收

逢星期六我就會去IKEA餐廳吃早餐，這裡環境靚，又自由，價錢比出面平。

這是上星期吃的。

價錢真的平，加3元就有咖啡/汽水免費添飲。咁平，係因為你要自己收拾吃完的東西，將所有東西放去指定位置，即係佢地可以請少啲人。

好奇媽是好奇的人，自然會周圍觀察，我覺得這個經營模式很成功，因為我見到啲人見價錢平咗，食多咗！！佢地扺受不住價廉物美的誘惑，加5元多一個英式鬆餅，3元一個牛角包，3元一塊厚多士自己擦醬自己焗，1元又可加買一小盒牛油/士多啤梨醬，實在樣樣都好抵。結果埋單其實仲使多了錢，不過開心囉，個早餐有「自由」的味道！

每次推住餐車自選早餐，我都覺得自己受到很大的引誘，不過我最後都堅持到，只買自己需要吃的份量，以免吃不完， 浪費食物。

在此， 我感受到一股神奇的力量，「 自由」 會形成一股推動力， 推動你想得到更多！對食物如是，對知識也如是。

當自由選擇的是食物，你會吃多了。當自由選擇的是知識，你會學多了。但當一個人的本質是喜歡吃，會吃得太多，結果是太肥了，而當一個人的本質是喜歡娛樂，自由就令他只學會玩和消費。如果一個人自制力強，有自律精神，我們應該給與更多的自由，當這個人喜歡學習知識，我們應給與更多的選擇。

到底應該給孩子多點自由？還是多點管朿？還是要看孩子天性，他/她到底是個怎樣的人？

讀醫都失業？

今朝睇咗一篇文章，我覺得有理有據描述詳細，可信度高。

[DBS][grad]《醫療科，史上最大嘅伏》

醫療科，係好多DSE學生嘅目標。但係如果你知道你辛苦讀完醫療科可能會失業，你仲會唔會想入醫療科？作為過來人，我奉勸各位唔好入醫療科（medic/dental/nursing除外），因為各醫療科都已經／將會係不久將來飽和。

先講pharm，舊年畢業嘅同學大把都搵唔到藥劑師嘅工，有啲唯有做住配藥員先，靜候機會做返藥劑師（不過其實無乜可能），有啲索性轉行。pharm本來係cuhk獨市，之後hku加入，再加上有大批人去外國讀藥劑跟住返香港做，每年畢業生越來越多。但係，藥劑師嘅位冇乜點加過。更甚嘅係，而家市道唔好，好多藥房都執笠／唔再賣藥，令到行業開始飽和。每年成百個fresh grad，位就嚴重唔夠，醫藥分家永遠都冇可能落實到，相信藥劑飽和情況只會越來越嚴重，行業市道一潭死水，前景一片黑暗。（2018入學飽和指數：5/5）

speech&hearing（言語治療）亦都係好多人嘅目標。呢一行嘅情況同pharm差唔多，本來hku獨市，而家poly/edu/cuhk都開讀2年嘅taught master（hku speech&hearing讀5年），遲啲連ou同東華學院都會開，由獨佔天下變成六國咁亂。其實社會對言語治療係有需求，但各機構都無錢請人，結果今年嘅fresh grad有成1/3都冇工開。相信之後隨住畢業人數越來越多，失業比例只會越來越高。言語治療師供應完全失控，政府坐視不理，行業前景同樣一片黑暗。（2018入學飽和指數：5/5）

以上兩個行業已經有失業潮，但相信其他醫療科好快就會步佢哋後塵，質素低嘅學店亂開醫療課程賺錢而政府唔理，尤其令人嘆息。

放射本來poly獨市，而家poly收生人數上升，東華又有開（準確嚟講係放射治療，即係放射嘅一個branch），距離飽和之日不遠矣。（2018入學飽和指數：4/5）

醫療化驗本來得poly同space有，而家poly收生人數上升，東華又有開，相信好快會飽和。（2018入學飽和指數：4/5）

職業治療本來得poly有，而家poly收生人數上升，東華同poly master又有開，遲啲ou又會開，又多人喺外國讀完返嚟做。但職業治療勝在而家暫時仲多職位，但而家大量生產畢業生，過多3、4年都係凶多吉少。（2018入學飽和指數：3/5）

物理治療情況喺各專職醫療入面最好，本來poly bachelor獨市，而家多咗poly master爭飯碗，遲啲東華同ou又會開，又多人喺外國讀完返嚟做。但係物理治療而家仲好渴市，短期內仍然唔太差，但長遠都會飽和，可能東華／ou開班之日，就係行業失業潮嘅開始。（2018入學飽和指數：2/5）

綜合以上各科，醫療科吃香嘅年代相信好快就會過去。各科飽和嘅原因都係嗰幾個：大學收生人數膨脹、有新大學（甚至連正式大學都唔係嘅學店）開課程、多人由外國返嚟執業。咁多醫療學生面臨失業，政府責無旁貸。其實各醫療領域社會都有需求、而且香港都做得唔好，但政府始終都唔肯擺多啲資源落醫療度，寧願俾錢培訓醫療學生跟著睇住佢哋失業，都唔肯擺資源去醫療。醫管局同ngo唔係唔想請人，事實上前線人員工作量極大、服務質素都唔好，但就係冇資源請人。

另外係把關不力，放任大學／學店亂開課程，無視畢業生會失業。政府資助大學培訓一個醫療學生，成本好高。如果有大量畢業生失業，係浪費公帑。但政府一方面要求大學加學位，又容許大學／學店開新課程，係判斷失當。再者，畀東華、ou呢類連正式大學都稱唔上嘅學店開醫療科，簡直係危害病人安全。一嚟佢哋課程係咪足夠全面都成問題，佢哋仲大條道理咁先收學生再用學生要脅專業委員會承認佢哋嘅課程，佢哋嘅畢業生到底係咪有足夠能力令人懷疑。二嚟雖然成績同工作表現未必掛鈎，但佢哋嘅收生分數低到連八大都可能入唔到，就畀佢哋做一啲隨時影響病人生死、唔容許出錯嘅行業，好難令大眾信服佢哋嘅能力。政府對專業課程把關不力，累死醫療科同學，亦都連累普羅大眾。

總之，各醫療同學祝你好運；未入大學嘅就諗清楚你係咪真係想讀醫療科喇。

利申：上述某科畢業生，已經轉行

******
好奇媽言：

大學讀什麼科目，第一要睇興趣，第二要睇前途。大家都知，香港係地產和金融業獨大的崎型經濟，無論讀什麼科，最後都係可能做咗地產經紀或股票/保險經紀之類。想擺脫呢兩行，唯醫護業，教育專業莫屬。

現在醫護業可能會失守了！

我們的梁朝偉/胡歌

有一次看一個劉嘉鈴的訪問，她說：「劉嘉鈴是有爭議的人，梁朝偉是沒有爭議的，有誰會討厭梁朝偉？梁朝偉便是『我們的梁朝偉』。」

我覺得劉嘉鈴真是一語中的，被她一說，我真是留意到：沒有人不喜歡梁朝偉。

中國的胡歌，有着和梁朝偉一樣的氣質，那種感覺，很像！

他們那份內斂，那種深度，那種與世無爭，那種演好每一個角色的專業精神，實在太像了。

於是我百度一下：有人討厭胡歌嗎？

得出以下分析文章：
零負評男神
http://hottopic.chinatimes.com/cn/20160224005036-260806

我估中了，沒有人會討厭胡歌，正如沒有人討厭梁朝偉一樣！

為什麼他們那麼相像？因為兩人都是發展得很好的infp! 可能還有吳彥祖。

I, 內斂的
NF，幽默的，情感豐富的
P，温和的

阿仔愛出題

阿仔鍾意自己出題目考我哋，今日又出了一題：

哪一點是錯誤的：
（1） 質數全是單數
（2） 質數可用簡單方法找出
（3） 質數可經找該數的因數找出

（3）一睇就知正確啦，我選（2），阿仔說不對，我問佢有咩簡單的方法可找到質數，他說：

「只要有電腦，沒有難題解不到。」

佢咁押韻，搞到我忍俊不禁。我問佢咁為何（1）是錯誤呢？

他說：「因為2係雙數，但又係質數。」

又係喎！

再推介淘寶產品

今日又去自提貨品，今次集運十件貨品，大約四十元運費。

上面圖片只係部分貨物，我懶得全部拍照，順手拍一拍而已。因為以上啲貨我未用過我不會推介，以下是我用了一段長時間覺得好的貨物，中伏的就唔講了，中規中矩的也懶得講。

https://m.intl.taobao.com/detail/detail.html?id=44848409271&spm=a312a.7700846.0.0.1721bb9b4phTMW&_u=8a3mp83008c
男裝背心形底衫，黑白灰色，我老公着完覺得好舒服，又買六件細碼的俾阿仔着。

https://m.intl.taobao.com/detail/detail.html?spm=a1z09.2.0.0.6008c2efxRmvn7&id=45600963433&_u=8a3m
運動鞋，其實我們淘鞋中過好多次招，因為大陸啲鞋款式靚又好，舒服又好，但就係唔耐用，終於找到呢款，我着咗成年都仲好新淨堅固。我自己加了鞋墊，我覺得好舒服，唔知唔加鞋墊會點呢？因為在大陸買鞋一定係買大少少，佢地經常唔足碼，如果係足碼的，我應該會覺得鬆，咁就加鞋墊。

穿了成年的樣子，一百元，粗着真係抵。

https://m.intl.taobao.com/detail/detail.html?id=535486069851&spm=a1z09.2.0.0.6008c2efxRmvn7&_u=8a3mp838762&sku_properties=-1:-1
着過呢啲睡衣會覺得香港的唔好着，又貴，香港有錢買唔到咁舒服的，因為香港唔興咁樣款式的睡衣。

https://m.intl.taobao.com/detail/detail.html?id=45395810461&spm=a1z09.2.0.0.6008c2efxRmvn7&_u=8a3mp83ed48
童裝，啲棉質好舒服，又平！

https://m.intl.taobao.com/detail/detail.html?id=521580451048&spm=a1z09.2.0.0.6008c2efxRmvn7&_u=8a3mp83fae8
我本人認為買俾小朋友穿來睡的衣服一定要收袖口，因為點睡都唔走樣，唔會凍親手仔腳仔。

https://m.intl.taobao.com/detail/detail.html?spm=a1z09.2.0.0.6008c2efxRmvn7&id=530602445725&_u=8a3mp83cee8
內褲，舒適透氣。

https://m.intl.taobao.com/detail/detail.html?id=41659702718&spm=a1z09.2.0.0.6008c2efxRmvn7&_u=8a3mp834b9a&skuId=3196232192445
冇味！我最討厭一陣味的潤唇膏，呢個冇味又 滋潤又平，就來冬天，快啲買三支。而家超市和藥房都加價了！

因為第一次用「支付寶hk」，送了50元購物卷，第一次用手機「嘟」電腦的二維碼，覺得很新奇！我覺得自己很大鄉里囉～

相似文章：

淘寶產品推介

http://curiousboy2016.blogspot.hk/2017/01/blog-post_7.html?m=1

什麼瓜果都去皮

以前我食蘋果連皮食，煲冬瓜湯會連皮煲，因為人地話蘋果皮和冬瓜皮都有它的營養。

不過，而家所有可以切走的蔬果皮，我全部都會切走。

因為之前睇咗個節目，叫「 荷爾蒙殺手」，講我們日常使用嘅化妝品、護膚品 、染髮劑、 指甲油 .... 原來全部都有好多 化學物質, 係會改變我哋嘅荷爾蒙嘅。 有啲女人因為接觸化學劑過多， 連生出嚟嘅bb都有崎型現象。

而我哋經常會食落肚嘅化學物質就係農藥， 基本上食一粒提子都有幾十種 化學劑。 所以我哋食生果一定要洗得好乾淨，蔬菜都要浸一個鐘頭嘅水，至於可以去皮嘅 瓜果，當然 最好就係去皮啦！ 所以琴晚嘅冬瓜湯，冬瓜係冇皮嘅。

 雖然我唔會再生bb， 但係食物我個仔都有份食， 唔想第二時個孫有咩問題。

第一堂愛情課

笑咗！

「唔好表白」呢個point正，我成日都覺得表白係白痴行為。連我仔向幼稚園的女孩表白咗（三歲時），都立即變兵，俾條女老點去掉鼻涕紙巾，好在畀我見到， 丙到條女上天花板。 返屋企再丙到個仔上天花板， 我話：「 鍾意邊個要擺喺心度， 一表白咗就會做咗觀音兵。」

呢個係媽媽第一次為他上嘅愛情課。 自此之後， 阿仔唔單止冇向任何女仔表白， 好似都冇鍾意過任何女仔， 可能佢發現咗， 愛情同親情係唔一樣！ 平時，我們在家裏互相表達愛意，攬攬錫錫，從來都唔需要計算，但係愛情就充滿咗計算和機關。

耳朵懷孕了：Andrea Bocelli

人說上天關了你一扇門，一定會在那裡為你開一扇窗，Andrea Bocelli先天有青光眼，後來一次意外完全失明了！但上天賜了他一把天賴般的聲音，唱起歌來不費吹灰之力。他的聲音太好聽了，他和莎拉布萊曼都是古典與現代歌的跨界別歌手，唱古典又得，時代又得，曲風是抒情浪漫的。聽Andrea的歌，用耳就得了，冇乜嘢睇的，所以可以一面聽一面做事。

Time to say goodbye! My beloved.

Besame Mucho, my 飛佛。

和Celine Dior合唱，跟他合唱的女歌手一定名氣不弱。

我從圖書館借了一隻回來聽，一面聽一面寫這篇，感覺耳朵懷孕中......

相似文章：

TAYLOR Swift

http://curiousboy2016.blogspot.hk/2017/11/taylor-swift.html?m=1

水蛋不老的秘密

蒸水蛋如何才不會蒸過時變蜂巢水蛋？

不要分心，不要分心，不要分心。

重要的事講三次。

其實整個過程係幾分鐘咋，只要你睇住佢，像望住你個仔的滑滑屁股一樣，見到佢好滑好滑，全個面都熟咗，就關火焗一陣，等佢熟透心，咁就得啦！

如果你個蓋唔係透明，耐耐打開睇下囉，千萬唔好走去做其他嘢，一走開就老了！

手機方一日，世上已千年！

支付寶HK

我的起心肝下載了「 支付寶hk」app, 因為我們經常都會淘寶，小數怕長計，所以想看看是否更優惠和方便。

平時我們用pps, 收費是1.5percent, 支付寶hk是0。

想知多啲相關收費比較：
https://muous.blogspot.hk/2014/05/blog-post_29.html?m=1

手續費肯定係支付寶hk最平，至於匯率就難以比較，因為除了支付寶會在網上付款時寫明對換率，其他都冇寫清楚，總之你感覺個數ok就俾了，我又不是大額交易，通常都得過且過。不過我見支付寶咁公開，坦蕩蕩，覺得佢一定冇問題，昨日付過一次款是1：1.18，我覺得ok.

除了淘寶，佢仲有好多functions, 不過我都未用，但知道點用，感覺係好user-friendly, 十分方便，落街買豉油真係唔使帶銀包。

有多項功能，聽講食飯夾錢都得喎，不過我唔使用呢個function, 冇研究。

去便利店入錢或網上轉錢，都好方便。

付款時俾職員「嘟」二維碼就得了，好似還要入密碼，其實都好，跌咗部手機，人地唔知密碼都用唔到。

講真，銀包我都有機會跌，手機反而不會跌，因為使用率超高，唔見咗幾分鐘都會發現。

如果你唔係用iPhone, 手機都好少俾人偷，我呢部Huawei, 擺低行個圈都冇問題。你站在賊的角度想想，同樣係捉到會俾人拉，風險一模一樣，有乜理由偷部cheap㗎！所以，我真係幾鍾意用平嘢，冇心理壓力，我自知大頭蝦，細個都唔知唔見咗幾多個水壺和幾多把雨傘。

如果你小朋友係好似我咁，np型，記住要預咗佢唔見哂啲嘢，唔好嬲。哈哈！

那是推理及預測

Intp是生活在未來的人，其實nt的人都是喜歡預測未來的，intp內向，少有將預測說出口來，但entp經常會說出來，所以entp中文又叫「先知」，他們在朋友之間經常都會預測一些東西，例如明天那隻馬會跑出之類。我其實是一個很喜歡預測將來走勢的人。

我預測lB將來會成為那些本身科科很好，性格活潑外向，但知道自己考DSE中文及通識肯定唔合格的人的「選擇」，那是一個「預測」。我絕對不是說，現在每個正在讀和打算讀IB和國際學校的人是因為想入本地大學，才去讀IB的，絕對沒有這個意思。

昨天我出了一篇相關李存信的電影的blog，我說李存信一定係e，因為他竟然可以三個月內識了個鬼妹上埋床，有blog友立即whatsapp我問，為什麼她的老公也是enfj, 但完全不是這樣？我回答：「阿媽係女人，唔代表所有女人都係阿媽呢！所以，e型溝女比i叻，唔代所有e型都溝女叻呢！」

套用上述例子說同樣的道理，希望大家別誤會我的預測，我是指會有越來越多的人走這條路入本地大學，不代表所有考IB的人都是同一個目的。

我認為理智的家長，都是奔着孩子感興趣的科目的國際排名而做事，考什麼試都一樣，考lB也好，DSE也好，大家都是想考一間認受性高的學校，還有「性價比高」的大學。舉我自己做例子，我打算俾阿仔考科大，唔代表史丹福收我仔，我會唔俾佢讀，而考唔到科大，唔代表我就一定唔會俾佢出國讀書，否則我們就不會日日煲「 升學無疆界」了。我們其實都是「看着辦」的。我認為大部分家長都是看着辦的，因為大家其實都唔知自己的孩子在公開試的實力如何。

另外，我是不知道IB的中文是否比DSE淺的，我說考DSE中文一定肥的人會去考IB，不代表我覺得DSE的中文比lB深，但我覺得更有「靈活性」。DSE的考法是硬橋硬馬真功夫，一試定終生的，而IB就一部分分數去咗做projects, 咁就唔使硬記一些資料。做projects考的是資料搜習能力， 長時間的分析能力， 溝通能力，presentation 的能力，而DSE是要即時作答， 冇時間畀你慢慢思考， 要有嘅資料一早就要儲存咗喺人腦。 如果冇強大嘅中文閱讀基礎， 好難會考得好。但lB真是唔係咁需要依賴長期而紮實的中文根基。IB雖然都有即時考卷，但不像DSE的佔分比重那麼高。所以，我推理考唔掂DSE可以去考IB，但在此再澄清一下，是有人將會有這樣選擇，不是所有人都會做這個決擇。


相關文章：

Jupas or non-jupas?

http://curiousboy2016.blogspot.hk/2017/11/jupas-or-non-jupas.html?m=1


相關lB未來走勢的報道：

https://topick.hket.com/article/1934019/%E6%83%B3%E5%81%9AIB%E7%8B%80%E5%85%83%E7%9A%84%E9%97%9C%E9%8D%B5%E6%98%AF......?mtc=10027

Taylor Swift

上個星期介紹咗周杰倫俾阿仔識，今個星期介紹美國唱作歌手Taylor Swift.

我一向少聽英文歌，多謝博友推介，集思廣益。

我聽完覺得Taylor Swift真係得喎，佢把聲好靚，咬字很清楚，我覺得比Beyonce更好，Beyonce把聲有啲混音，我本身就係喜歡清晰的和key高的女聲。而且佢的Video全部都拍得好靚好好睇，又有時代感。我介紹阿仔聽這三首：

聲音很高清。

Video真係好睇，好有故事性。

最近引起爭議的video, 因為件機械人衫好似冇着衫咁，但我覺得唔咸濕喎，好型喎，照俾阿仔睇。

阿仔唔抗拒，因為佢啲video都幾好睇，但我估慢歌和愛情歌，阿仔就唔會睇了。

毛主席的最後一位舞者

朋友推介我睇這部電影，我在YouTube上揾到，就睇咗，今晚星期六，阿仔都得閒，就用Google Chrome在電視上播放，一家人一起看。故事真人真事，李存信係一個舞蹈家，中國把他送到美國學習三個月，佢被資本主義社會深深吸引，更與當地女人結婚，留在美國。當時引起了很大的爭議。我認為這套電影可以令阿仔對近代中國有更多的了解，在片中有很多六七十年代中國美國的場景，有資本主義及共產主義的對比，可以令阿仔更明白中國由什麼狀況走到現在。

另外影片是中英文夾雜，不是完全中文又不是完全英文，而且片中的英文很容易聽。

知多啲：
https://zh.m.wikipedia.org/zh-cn/毛泽东时代的最后舞者_(电影)

唔知點解attached唔到段片，大家有興趣的可以上YouTube自己找找：

頭兩條片就係了。

李存信一定係enfj, 原因：

e：去美國三個月可以溝到鬼妹上埋床，都好識溝通喎，仲要係剛剛學英文，自己睇書學的。

Nj：細細個已有「直覺」感覺到改變命運的機會到來，為爭取機會選拔時死忍住痛，肯定係nj

F：中國的舞蹈者都像「 跳舞機器」，只有他不一樣， 證明佢天生有藝術感， 所以係f。 加上佢最後決定留在美國， 明知自己的家人喺中國會被批鬥， 但毅然決定留下， 呢個決定屬於感性。

佢退休之後做的工作， 同埋佢都讀得書，這些都顯示佢係enfj. 

電影改編自呢一本暢銷書。

此片中國禁播。

就算係虎媽

昨晚有個親戚同我老公傾电話，佢話睇咗我fb，見到我仔一口氣背四十幾首唐詩，佢同我老公講：「你老婆真係識引導，就算係虎媽，都要個細路肯先得㗎！」

我朋友都唔明白，佢覺得自己明明正正常常，都成日俾人誤會佢係虎媽，莫名其妙。我食咗呢個死貓好多年，都習慣哂了！親朋戚友都覺得我「迫」個仔讀書。

世界上都幾多人覺得細路仔係要咩都唔識先叫「正常」，只要你從小有學習，無論你係補習定阿媽教，人地都會覺得你係「迫」個小朋友讀書。有啲人覺得小朋友喜歡學習就係「唔正常」，一定係阿媽幹的「好事」。

我仔從小認字閱讀，其實我們都有很多閱讀以外的照片放在Facebook, 不過好多人可能覺得去博物館去科學館去參觀乜乜物物都唔係叫「正常」，咁「悶」，應該要好多小朋友好嘈咁玩才叫精彩的「小朋友活動」。

我真是想對那些人說：「其實個個小朋友都唔同，真係有小朋友鐘意博物館㗎!」今次個親戚見到我仔笑笑口咁背了42首，佢真正明白了：其實真是有人會喜歡背唐詩㗎！（所以佢終於講咗句公道說話：你老婆引導得好！）

我仔真是喜歡學習㗎，唔喜歡吃喝玩樂㗎，叫佢食飯叫到聲沙，無論幾鍾意的食物都不及一本書吸引。有次佢坐上一架商場的玩樂車子上，我見佢咁喜歡部車，就入了幾蚊，音樂一響佢就嚇到喊，大叫要走，人家覺得「嘈吵」是開心的，佢覺得好驚囉！

都話咗個個小朋友都唔一樣，一個小朋友喜歡看卡通和打機，喜歡吃東西，是正常的，但不喜歡這些東西，而喜歡學習，都一樣是正常的孩子。

官津學校為誰設計

經常見那些什麼「功課奴隸群組」的家長大罵香港的小學如何如何壓抑孩子創意，刻板和機械化，其實他們只知其然，不知其所以然。

為什麼香港教育會如此呢？其實，這個教育制度是為大多數人而設計的，不是為每一個人設計的。大家看看16型人格分佈圖，最多的人口是屬於那種性格的呢？

Isfj佔人口14percent, esfj佔人口12percent，istj佔人口12percent, estj佔人口9percent, 這四種sj型的人，夾埋佔人口47percent, sj型的 人， 像牛一樣勤力，他們個性捱得苦，但刻板冇創意， 他們學習的模式是要一步一腳印，step by step， 慢慢學習， 他們的智力一般屬於中等。這些類型的人很適合官津教育，因為官津教育就是為他們設計的。裡面的老師絕大部分也是Sj型，即是行政多於教育的人，兩個字：刻板。

Sj型的人， 最討厭創意， 因為我家有兩個， 所以我很清楚這一點。 如果我千變萬化地做菜， 我老公和奶奶會唔高興。 他們把他們覺得最好的那一樣餸菜，做到盡善盡美， 例如奶奶喜歡食鹽水雞， 如果畀佢揀，隻雞一定係做鹽水雞，佢唔會覺得我今日要食鹽水，聽日要食豉油，後日要食咖哩雞，佢只喜歡 「最好的」不停重複。 我老公亦是一樣，初初我做嘅麵包千變萬化， 每次都有唔同嘅味道， 最後老公話：「 做白麵包得啦, 日日擦唔同嘅醬咪得囉！」 他們就是這樣， 什麼都喜歡「 不變應萬變」， 只要把「 本份」 做好， 就行了！ 既然是這樣， 我跟他們生活豈不是很辛苦？不會， 因為我是P型， 辛苦咗一段時間之後我就會適應，P型的人， 有很強的適應能力。不過適應唔代表我不再喜歡千變萬化，只是我的本性被壓抑了！

我地又睇番上圖表， 你會發現最後一個碼係P嘅人大約佔一半， 所以個制度雖然係為sj而設， 但係所有P型嘅人，最後都適應得到並且生存下來。他們總共佔人口的44 percent.

47%同44%相加, 總共係91 percent, 即係呢個官津教育嘅制度可以畀91 percent嘅人使用， 47個percent人用得好開心，44個percent嘅人 將將就就咁樣用，咁另外嗰9個percent，其實就係覺得呢個教育制度好難頂。 而9個percent嘅人就係intj，infj，entj 同埋enfj。 不過咁啱，這四隻型號都係學霸, 前兩者因為係i， 佢哋返了幾年學之後，會學識掩藏自己嘅不滿， 帶著假面具返學， 後兩者因為係e， 佢哋有咩不滿會表達出嚟， 所以都好容易成為老師嘅眼中釘， 不過一般嚟講佢哋嘅成績都會不錯，只係官津學校係浪費緊佢地，如果教得冇咁刻板， 佢哋可以發光發熱。 仲有嗰一批P型， 其實佢哋只係咬著牙關喺度默默承受， 到咗中學佢哋就會適應曬， 適應唔到嘅，就算聲音大，都係屬於少數。（大聲唔代表人多）

所以點解有咁多「 小學生的家長」喺網上到投訴香港的教育制度， 就係因為有53個percent嘅人，其實都唔係咁適合， 但係佢哋又要忍受住， 以前冇平台大家冇互相吐苦水嘅機會，反而冇咁大怨氣， 因為大家都係啞仔食黃蓮，有苦自己知。而家有咗群組之後， 怨氣就被一下子發出嚟啦！

而家出咗好多直資學校、私立學校， 人人都趨之若鶩，其實我本人係覺得，如果你個小朋友係sj型， 其實選擇官津，真係有適合佢哋，又唔使畀錢， 唔錯㗎！

BTW, 我仔係intj, 絕對唔適合官津，不過呢啲類型，有得揀的直資私立係唔會要的，無奈。

豉油雞的秘密

豉油雞係人都識整，但點先整得好食呢？留意以下三點：

（1）豉油要夠多浸住隻雞，唔準溝水，一滴都唔溝得。吓？咁咪要落哂成支豉油？係，煮完的豉油可以重用㗎，用個玻璃瓶裝住放雪櫃，照樣可以用來炒菜的，唔會浪費的。但如果下次又重用來整豉油雞，要加鹽和新豉油，否則隻雞會又淡味又老。

（2）加冰糖，瑞士雞翼為何好食？咪因為加咗冰糖囉。

（3）水滾落雞，之後要轉最細火煮熟（一般要半小時for whole chicken), 如果用了猛火，隻雞會鞋。

要加薑䓤老抽之類，大家應該知，不贅。

咖哩薯仔炆牛肋條

這是超易整又好味的餸。將急凍牛肋條（解凍及汆水）、薯仔、咖哩醬、水、冰糖、薑一齊煲到淋哂， 分量自己adjust,  講完。

我仔成日食餸唔食飯，要煮多啲薯仔畀佢食， 等佢食多啲澱粉質。

P.S. 我用李錦記咖哩醬，已經含鹽，所以不用加 鹽。