棉花雞

你去茶樓喜歡叫「 棉花雞」嗎？我就覺得很好吃，其實大家都係想食舊棉花啫！

「棉花」吸了雞汁超好味囉！

不過得一兩舊，唔係好夠，大家有冇想過自己整？

這是自家製的「 棉花蒸雞」。

其實所謂棉花， 咪即係沙爆魚肚囉！ 照片中細碟嘅就係棉花啦～

將沙爆魚肚浸淋， 用薑蔥飛水， 冰鮮雞切成雞球，去皮， 加入杞子紅棗 蟲草花 及調味料（ 鹽 糖 麻油 生抽 雞粉）一起醃好。

大概醃一至兩小時， 大火蒸半小時，即成。

好味又健康！

棉花吸曬啲雞汁，真係好美味！

同場加映：

今日試做花卷， 用咸蔥油來做嘅嘢乜都好味， 但係我真係唔識得扭花卷， 到底係點樣扭㗎？

睇到係咪以為我整冬陰公湯呢？ 絕對唔係， 我哋屋企除咗我冇人鍾意食辣嘢， 小朋友更加唔食得辣。

我呢一個係羅宋湯加蝦， 哈哈哈！

濃濃的番茄味， 老公話好鍾意。

次次都用排骨嚟煲苦瓜湯， 今次試下用魚尾有咩效果， 應該冇人乜試過， 不過上網見有人試過用魚頭嚟煲。

這個是鹹菜苦瓜黃豆魚尾湯。 千祈唔好覺得怪， 鹹菜配苦瓜係正常㗎！

我用呢款鹹菜。

呢個新嘗試好唔好味呢？嗯… 魚尾好鮮味， 黃豆苦瓜鹹菜湯都好好味， 但係佢哋好似唔能夠互相融合。 苦瓜 又叫做君子瓜， 佢自己苦自己， 唔會令到魚尾變苦， 但係佢哋煲埋一齊， 我飲到個湯就係 苦瓜黃豆鹹菜湯， 魚尾自己 保持住自己嘅鮮味， 啲湯唔覺得好有魚味，奇怪。 所以下次我都係煲番苦瓜排骨湯好啦！ 都係嗰個組合好啲。 

魚尾都係煲蕃茄薯仔湯最好！ 魚尾同蕃茄薯仔 真係好夾， 佢哋嘅味道係融為一體嘅！