今年阿仔近視又深咗，又要配眼鏡了，和大家分享一下配眼鏡的心得。
我每次講配眼鏡，總有人會推介啲貴嘢俾我，原因係「眼睛很重要」，所以無論幾貴都值得。我唔係話眼睛唔重要，但係我唔相信「俾得貴等於買到了最好的東西」這會事，我覺得價錢和物品價值通常都係唔相等的，但係同服務質素，真係有相關。
例如在萬寧買一罐奶粉同在葯房買，價錢相差五十蚊，貨品有冇唔同？答案係冇，我打電話去問過奶粉公司，佢地話全部都係真貨。咁點解會貴成50元呢？差別就係個服務啦，如果你仔飲咗一杯覺得唔好味，要去換貨，葯房老闆會媽叉你，但萬寧職員唔單止不會媽叉你，仲肯俾你換過隻牌子。所以，差價是在服務，不在貨品。
我呢啲師奶仔為了省錢，成日都會幫襯啲服務差的公司，例如我買modem係全港最平的，因為上格價網格完先去那間公司買，店員一知我上過格價網，知道佢公司的底價，通常面都黑埋，死死地氣咁賣俾我，連話都唔同我講。如果係就咁walk in, 佢地會開價高二三十蚊的。
我兒子細個時買奶瓶都係咁，同一品牌的奶瓶不同分銷商，開價都不同，不過賣得平的，老闆成日面燶燶咁，賣貴啲嗰間，老闆態度會好啲。
所以大家明白，官津學校的老師點成日冇水洗面咁？就係因為家長唔使交學費囉！wakaka....
一年過咗，阿仔塊面都大咗啲，所以今次副眼鏡配返大少少。下面嗰副係新的，今次選了灰色。
我唔知大家覺得配眼鏡最重要係乜，我覺得眼鏡架的重量係我第一考慮因素，我只會在最輕的鏡框作選擇，重的一律唔睇。這是由於本人戴咗三十幾年眼鏡的經驗告訴我，眼鏡重很容易犯頭痛，因為一副眼鏡戴足一天，重啲啲加埋都是傷害，小朋友係傻傻地的，少少唔舒服，佢地唔識講。以前眼鏡選擇少，有好多時都配金絲眼鏡，戴完鼻骨有兩個印，其實唔係咁舒服，我見長期戴金絲眼鏡的同學，一脫下眼鏡便樣子怪怪的，好像有點「走樣」。當你發現小朋友有成日托眼鏡的習慣時，肯定係眼鏡太重或者鬆弛咗，要留意。
我覺得最輕巧的是韓國眼鏡架，自從用過韓國架之後，我就愛上咗。佢地係單薄啲，我試過用用下自己斷咗，但係間眼鏡舖肯俾過副新的給我。
我去咩眼鏡鋪呢？我係去觀塘apm相連的「港貿中心」配的，佢成層大廈有十間八間眼鏡舖，已形成眼鏡街的狀況， 競爭激烈， 所以價錢便宜。服務質素，我自己覺得還好，因為爛了他肯修，度數不夠準也肯重新配過給我，也沒給我面色看。 不過那裡的sales佣金應該不高，他們好多時都並不熱情。但我喜歡不熱情的，因為我有自己的選擇策略，不須要太多的講解。
港貿中心的眼鏡舖，我大大話話幫襯過四五間， 因為我是住在附近的，間間質素都差唔多。
今次幫阿仔配，選了一間聲稱最多兒童款式的。
我覺得選擇都真係比其他眼鏡舖多。 其他眼鏡鋪通常都係大人嘅款式多，呢一間小朋友的款式比較多。 通常男仔都係粉藍色，女仔都係粉紅色，我覺得成日都撞眼鏡，所以今次揀一間有選擇嘅，可以有唔同嘅顏色選下。
呢度的眼鏡舖有一個最大嘅弊處，就係驗眼唔準。 咁我又點知道佢驗得唔準呢？ 係因為我已經在盲人輔導會幫阿仔驗咗眼， 有驗眼報告， 然之後再來配， 我特登唔講自己有驗眼報告， 等佢驗完再睇下佢度數啱唔啱， 結果唔係咁準確， 我當然跟返萬人輔導會嘅數據來配。
今次配咗452元，已包含80元的防藍光鏡片，佢有一支藍光筆測試是否真是防藍光的。
我其實已經覺得四百幾蚊一副眼鏡好平啦，不過爸爸話：「淘寶仲平啦，幾十蚊副，包埋鏡片。你既然都驗咗度數，照度數訂購咪得囉！」
唉，我都知，不過小朋友眼鏡，我未去到咁大膽，我怕佢質量不好，小朋友又唔識講。不過我自己倒可以配來試下嘅！下次啦！
P.S.好明顯，平價的眼鏡店，其實係買少咗一部驗眼很準的機器和視光師。
