有人辭官歸故里

俗語有云：「有人辭官歸故里，有人漏夜趕科場」。新年去朋友屋企拜年，就體會到一件咁嘅事喇。

朋友a為咗個仔可以入讀出名嘅私立小學，就讀嗰間私立小學嘅私立幼稚園， 五千蚊一個月學費，如果升到上小學嘅話，就要大約一萬蚊一個月，佢話雖然表面上學費沒有那麼多，但係事實上，到時佢會巧立名目開好多嘅唔同嘅補習班要你小朋友參加，總之埋單大約一個月要一萬蚊。

另外一個朋友b，本身係教師，佢就教一間著名嘅官津小學，呢間小學好出名， 因為聽講入咗呢間小學嘅人，等於半隻腳叉咗入皇仁，咁啱我呢個朋友又係生仔， 但係我呢個朋友竟然唔稀罕，毅然辭咗職！ 佢話呢間小學搬咗新嘅校址之後，佢返工比較唔方便，而且工作量亦都比較大， 所以就辭職啦。有幾多人恨都恨唔到入呢間小學，佢竟然辭職，我心裏面都佩服佢。朋友b是鬼妹仔性格， 佢會做出咁嘅決定，我又覺得唔出奇喎！ 瀟灑！

一萬蚊學費到底係咪多呢？對唔同嘅人有唔同嘅睇法，如果好似趙薇咁有錢，一萬蚊一個月，都唔夠佢飲餐茶啦，但係對於一般中產，一萬蚊一個月唔算少，因為佢唔止一個小朋友。 香港嘅中產，又要供樓，又有好多開支，又要比家用父母，其實都幾大負擔。 點解咁大負擔，都要入名牌小學呢？

我嘅直覺覺得係，好多人都認為入咗名牌小學之後， 就等如有錦繡前程，就等於教育成功，所以無論畀幾多錢都要入名牌小學。

但就我所見的兩個朋友，朋友b在整個見面的過程中， 對小朋友的禮貌和規矩都很重視， 而朋友a似乎畀個仔食住， 完全沒有教育的章法。

莫非，不懂教育的人，更傾向付出金錢，希望金錢能彌補不足？