讀唔成書做什麼？

睇完那篇「全職媽媽問責制」之後，有網友告訴我，佢老公真係有講過「唔一定要讀得成書」。

這啟發了我進一步思考：到底讀唔成書（狹義地暫定為讀唔到大學吧！）可以做什麼？

我思考着。

我問我澳門的朋友：「你們讀唔成書的年輕人，做啲乜㗎？」

她說：「在澳門讀唔成書分分鐘賺得多過讀得成！因為有賭場呀！賭場人工好高㗎，一個叠碼三萬多，帳房有七萬啊！另外，識好多人讀唔成書走去做生意，發咗達，越讀得書越難發達。」

咁香港讀唔成書會點㗎？我再搜索下我的記憶，將我知道的年青人的狀況搜出來。

A 揾咗份醫院工作，唔錯的，不過後來覺得辛苦，去咗老豆的公司幫手，懶到死，一年四季都同男友去旅行。

B阿媽睇唔過眼個仔辛苦，又係將個仔擺老豆公司，又係hea下hea下過日子。

C老豆有錢，話送佢出國讀書，甚至兩公婆隨時可以跟埋去照顧，不過阿仔冇興趣，只喜歡宅在熟悉的家。老豆唯有送佢去股票行做經紀，入一畢錢去做佢個客，得閒咪炒下股票囉，好過宅在家打機。不過佢咩都唔做，老豆都可以養過世嘅！

點解我識嗰啲個個都有老豆照㗎？真係「成功靠父干」！（突然想起 許冠傑的「 尖沙咀susie」， 裏面有兩句歌詞係咁樣嘅： 尖沙咀susie使乜憂兩餐， 佢老豆勤力慣， 喺街市買 鴨蛋......）

D在香港升唔到大學，去美國重讀高中，住寄宿家庭。其實都係父母繼續養啫。

我估父母冇錢養的，應該做緊快餐店，送快遞，推銷員之類啩！不過我一個都唔識啊！因為我大部分的朋友的仔女仲細。

在香港，就算大學畢業，都係高級啲的推銷員，不是金融，就是地產，性格做不了推銷員的，就做一般行政工作囉！政府工是有，但職位不多。

在香港想創業成功很難的，因為鋪租太貴！做生意，no way！