應對死亡問題

朋友問我，公公死了，我仔的情況如何？朋友這樣問，是因為她知道資優小朋友對死亡問題非常敏感，恐怕我兒子不知如何面對。

的確，我仔在三、四歲時已經主動提及自己擔心我們三個照顧者會死去，三歲時更豪言壯語要發明長生不老藥，令嫲嫲唔使死。

我這次處理是很利落的，將對兒子的影響減到了最低。

大約兩年前， 我有一個朋友就發生咗差不多嘅事， 朋友嘅老爺死咗， 即係佢個仔嘅爺爺死咗， 呢個爺爺生前特別愛錫這一粒孫， 因為是長子嫡孫。

嗰一年之後， 朋友個仔大倒退， 上學不用心聽書， 能力倒退， 而且經常都唔開心。 初時都唔知咩事， 後來一提起爺爺佢又喊， 原來小朋友好想念爺爺， 佢仲畫咗寄去天國嘅畫，我們當時只是很感動，沒想過對小朋友是有傷害性的。 我哋從來都冇諗過一個小朋友， 面對老人家嘅死亡會係咁樣。 總之時日過去， 一年之後，小朋友淡忘咗呢件事又冇嘢， 但係無端端嗰一年就影響咗學習。

對於這件事，我同99傾過，99話，如果家中有老人將會去世，要在老人家精神好的那幾日帶兒孫去見最後一面，一來老人家清醒，見面有意義，99係護士，見得人死多，她說去到最後階段跟本無意識，見來都冇用，而且人死個樣好難睇，唔好俾小朋友見到。我那個朋友心想給兒子見爺爺「最後一面」，沒有防範，結果對兒子影響甚大。小朋友的年紀也很重要，如果小朋友五歲以下，其實見到都冇感受的，所以當時同場還有其他孫兒都沒什麼後遺症，係呢個大孫當時有八、九歲，正屬於唔大唔細的年齡，受傷最深，細的唔明，大的可以處理自己情緒，係唔大唔細最麻煩。

有了認知，我就處理得很好，一知道公公有生命危險，我立即安排了兒子去醫院見面，當時兒子一直認為公公會好起來，小朋友看得正面的故事多，總是很樂觀的，公公也答應好返一起去飲茶，那是他們最後一次見面，是樂觀的。之後所有事都不讓孩子參與了！兒子也是有意無意地躲着不想面對，我們也是輕輕帶過，這樣避重就輕把事情混了過去。

可能很多人都覺得死者為大，要小朋友去參與身後事，但我覺得「生者為大」，應該以在生人士的感受為本。如果人在生的時候沒有被好好對待，死後搞得多大也是沒有意義的。

總結，趁父母還在時要多見面，對他們好一點。自從父親走了，我盡量叫自己對阿媽好啲，我還日日迫99食鈣片、醋豆之類，希望佢捱得耐啲。