Greedy or ambitious

觀塘碼頭喺我哋屋企附近，既然有呢個優惠，就順便去享用一下。

好耐冇見過呢款痰罐。

呢首船係以為舊作為主題，所以周圍個佈置都好懷舊。

上船嘅時候人唔多， 但係後來回程嘅時候人多到爆。 下次真係便宜莫貪！哈哈！

既然一場去到西灣河， 我哋又順便去參觀滅火輪， 點知今次竟然遇著導賞團， 之前我哋都未試過參加導賞團， 諗住即管聽下佢講乜， 希望可以知多啲。 點知呢個伯伯， 講嘢資料性一啲都唔豐富， 吹水多過實用， 我都不知幾想帶阿仔走， 但係阿仔為咗伯伯嘅小禮物， 堅持要留落去， 而且搶答咗好多條問題。 除咗阿仔， 另外仲有一個小朋友， 嗰個小朋友就內斂得多。

呢啲就係阿仔攞返嚟嘅無聊小禮物。

喺好多年前， 我做過一間補習社嘅補習老師， 見過有一個小女孩， 為咗一份老師嘅禮物， 瘋狂搶答， 但每次都答錯咗少少， 但係佢再接再厲， 鍥而不捨， 一定要攞到呢份禮物為止。

我當時在一邊觀課，我嘅感覺係覺得呢個小女孩實在太乞人憎， 無可否認佢有一種一睇就睇得出嘅過人智慧， 但係我內心好唔願意承認呢一點， 我只係覺得佢討厭， 因為佢太過貪心， 我哋中國人，最鍾意就係「 溫和謙厚」 的人， 所謂「 謙謙君子， 溫純如玉」， 我都希望自己有一個咁嘅小朋友。 

我個仔平時都係屬於低調， 佢係唔會周圍顯露佢嘅知識， 但係當佢有小禮物嘅時候， 就會變成另一個人! 所以我今時今日先至發現， 佢有entj嗰種乞人憎！我仔本身係I, 比較喜歡隱藏實力， bb時佢已經識好多字，但佢死都唔會願意喺人哋面前表演， 呢件事都令到當時的我好頭痛，因為咁樣不利interview， 識幾多都冇用， 唔肯講出嚟即係等於唔識。後來我才發現，一有獎品， 佢突然間會變得好E！

我估唔到， 多年後出現喺我眼前嘅呢一個乞人憎的小朋友， 竟然係我個仔！！ 佢非常之aggressive！ 我在一旁滴汗。 嗰個伯伯都忍不住私底下問我：「 你個仔，係咪智力比一般人高？」

聽到呢句說話， 我並非沾沾自喜， 而係回憶起當年嗰個搶答問題嘅小女孩。 另外有一個小朋友， 一直都站在一旁， 本來佢哋兩父子 一直默默 聽導賞團， 呢個小朋友好穩妥，好安靜， 結果因為我個仔太搶鏡，佢個爸爸都忍唔住將答案畀個仔push佢答問題。 我突然間意識到一樣嘢， 我應該都好乞人憎， 我係一個對教育充滿熱情嘅人， 未寫blog時，一見到朋友就同人分享教育心得，結果令人地產生壓力！ 就好似呢一對父子咁， 原本默默無聞，輕輕鬆鬆喺度聽導賞團， 結果畀我個仔帶動咗競爭嘅氣氛，被迫加入戰圈！其實怪慘的。我以後都要提醒自己，唔好帶動競爭氣氛。

回到家中， 我開始認真思考點樣處理呢個問題， 呢幾日我都同個仔傾過， 以後只可以貪大，不能貪細， 什麼是「貪大」呢？ 就係貪入好中學，貪入好大學， 貪有好成就，貪成為一個對人類有貢獻的人！ 這種貪念叫做ambitious！ 男人應該都要有這種貪念！

如果貪小禮物， 就會變成師奶！

阿仔似乎明白了！希望下次我不在場時，他也知分寸。