Easy cook: 煎蝦錄

99的煎蝦真係香氣四溢，最近游水蝦平，每斤七十多元而已，我老公要求佢成日煮這道菜式，老公說：「 參鮑燕翅海味有咩咁好食啫，完全唔及呢啲活蝦鮮味！」其實都係㗎，海味冇雞湯去煲，其實係冇味，但鮮蝦就可以乜都冇，鮮味更勝一籌！最重要係易煮，海味閒閒地煮幾個鐘，鮮蝦幾分鐘（挑蝦腸另計）。

朋友話佢試過煮這個餸唔成功，其實這個餸係超容易㗎，唯一重要的是不能過火，因為蝦係好易熟的東西。

首先將蝦兩面煎至變色，灑上預先混和好的汁液，立即熄火冚蓋。等一會兒，餘熱就會整熟哂啲蝦，蝦肉又唔會過老。蝦如果煎至全熟才熄火就會過熟。

至於個汁液係點整？有人用鼓油，有人用茄汁，我99就喜歡用 冰糖溶液 加鼓油 加蠔油 加水，佢調的味道很好，因為她有天份。

大家不要問我份量，家中煮餸的人唔講呢啲，煮慣咗自然會有一種直覺。你看電視煮食節目，邊有中國厨師同你每樣調味料講份量㗎，佢地落鹽都係「灑一把」，用三隻手指，哈哈。表列調味料份量的只是「婦女新知」，我阿媽話跟嗰啲節目煮出來的東西不好吃。其實係，我阿媽煮咗咁多年都未培養到厨子的「直覺」，所以煮乜都一時好食一時難食，完全撞手神，唔關「婦女新知」事。