改變生活習慣減肥法

女人就快到40歲， 感覺真係唔同咗， 以前食極都唔算肥， 而家開始走樣！

我一向都肥肥地， 但係冇乜人知， 原因係我嘅面型係鵝蛋型， 屬於細面孔， 手腳都唔粗， 著件黑衫， 肥得嚟冇人覺得明顯。 但係最近唔同呀， 我發現自己嘅面型開始變圓， 咁真係大件事！

減肥呢家嘢唔係一暴十寒， 就算我唔食幾餐飯瘦咗落嚟， 都唔係長遠之計， 因為好快又會反彈。 但係如果我唔做啲嘢嘅話， 就會一發不可收拾， 我見幼稚園同學仔嘅媽咪， 就出現呢啲一發不可收拾嘅情況， 肥咗成40磅。

我認為 去到呢個年紀之所以肥， 係因為新陳代謝減慢咗， 必須要做某啲生活上面嘅改變先至可以 停止再肥落去。

我係好為食嘅人， 叫我唔食又有啲難， 咁唯有減飯啦！ 飯食得多容易變肥大家都知， 因為佢會轉成糖份。 我一向都唔鍾意食甜品， 咁唔食甜品又唔難。 所以以後都係同甜嘢say bye bye！（ 信住自己先，p型的人沒有毅力的。）

因為我天生冇乜毅力， 所以我知道自己係唔可能會用做運動來減肥。 咁我唯有減少自己攤喺度嘅時間。 成日攤喺梳化煲劇， 一煲幾個鐘， 想唔肥都難。 所以以後決定要企住來煲劇！ 我已經試咗幾日， 係ok嘅，唔算太難。 雖然我係唔會企定定， 我會旭嚟旭去， 會做下微運動，或者伸展一下。

嗰陣時聽鄭秀文嘅減肥心得， 印象好深刻， 鄭秀文說： 減肥要從改變生活習慣做起， 否則減完又會反彈。

總之我唔會做一個，放縱自己飲食，放縱自己攤喺度煲劇嘅肥師奶。 所謂防微杜漸， 肥咗就返唔到轉頭， 都係而家就要改變生活習慣。

寫低呢篇嘢提醒自己。