全職媽媽問責制

有朋友兩個仔已經上了中學，大仔考完DSE入唔到大學，二仔原本成績很好，一上高中就大倒退，聽說家庭搞得有點不和陸，辛苦工作的爸爸原本和太太很恩愛，現在開始怪罪起太太來，因為太太多年來都是全職媽媽，現在是「問責」的時候了！

見人當「全職媽媽」，你如果有工作的話，不要一味去羨慕別人，怪自己的丈夫唔爭氣，養不起自己或不願承擔所有開支，全職媽媽是要被「問責」的。

男人一旦把個仔交俾你，沒錯，尤其是仔，你是必定要讓兒子成才的，如果是女兒，會好一點，因為傳統社會始終認為，女兒嫁得好比叻更重要。

男人在孩子小學，甚至初中，都會對你言聽計從，基本上孩子所有的事都會俾你話事，入那間學校，學什麼才藝，如何安排作息，通常都交給太太決定，就算你是和他商量過的，到「問責」的時候，他會全部否認，因為佢「交咗俾你」，佢辛辛苦苦賺錢來滿足你和孩子的需要，到時一定要「交到數」。

如果你是全職媽媽，又是帶兒子的，唔好以為你老公「冇所謂」，千萬不要相信他那些「讀唔成書都唔緊要」的說話，佢到時會反面的。因為佢「俾咗錢你」「佢交哂俾你」，初中及之前廢，男人十個有九個未醒的，諗住個仔大器晚成嘛，到了高中，到了入大學前，佢突然會同你計，他會回想起你俾個仔學乜學物用了多少錢，又回想起你那套言之鑿鑿的教育理念，如果個仔順利入大學，皆大歡喜，反之，家無寧日，因為他感覺「被騙了」。

兒子的成敗，主宰了你的婚姻幸福。

絕非危言聳聽！

如果冇信心搞好個仔，不要當全職媽媽，兩公婆都要返工，冇得話怪邊個丫嘛！

BTW, 故事中的太太已經去工作了，因為讀唔成書的大仔要出國讀，自然要使錢。大家做全職媽媽的，可能都覺得自己係「識教之人」，人人都滿口教育方法，包括我，但實情係點，冇人知，邊套教育方法work, 真係要第十八年至知。