為何要做卷？

話說有日同個小一小朋友的媽咪傾偈，佢仔升小一第一次測驗，我私人醒咗一個拿高分的貼士俾佢，就是「做卷」。佢有朋友個仔讀同校小二，佢地感情好像很好，平時又西餅又甜點咁請她吃，我便叫她問那個朋友借上年小一的卷來copy咪得囉！

怎料，今日佢同我講，個朋友拒絕咗佢，原因係：「點解要咁做啫，唔使㗎！」我心偷笑，有多少個人像我這樣大方呢？莫講話同級，唔同級都唔借。有人成日多謝我在blog分享教小朋友的心得，我覺得為什麼不分享呢？分享之後會少了一忽肉嗎？其他人得益並無損害自己的利益的呀！就像這個case, 那個小二孩子的媽媽，如果真的分享了兒子的試卷給朋友，朋友個仔成績好咗，咁都不會令自己的兒子成績差咗㗎，大家都唔同級。

你們是否會覺得好奇媽很傻，對別人有好處對自己冇好處的東西都做？告訴你，對人好自然是會有回報的，上天自然把好東西安排給你。那我又是否把自己的東西全都給人看了，別傻，我在blog寫的東西只是我的小部分。i型的孩子懂100個字的話，他可能只說三四個給你聽，e型孩子懂10個，他會毫無保留，告訴你10個，所以e型孩子充塞在各大名校，他們面試表現一定比i型好。話說回來，好奇媽絕對是i型。

那個小一孩子的媽媽最後都沒有替孩子做卷，因為她相信了那句「點解要咁做啫，唔使㗎！」

原來有人會唔明為何小朋友要做卷的，難怪我以前叫一個朋友將哥哥的試卷保留給弟弟下年做，那個朋友都唔制啦，認為沒有必要。

那我便在此解釋一下吧！

要在考前做卷的原因：

要做到一份高分的卷，孩子要在限時內完成，要字體端正，要熟悉相關知識，要了解答題技巧。

如果孩子沒有做卷，他會出現以下毛病：

1.答唔哂/漏題/漏頁（漏頁？咁都有人夠胆死！係真的。）

2.字體肉酸/寫錯字/抄錯字扣分

3. 為了一題解唔到的題目hang機，唔識做下一題先；時間分配錯誤，低分題花很多時間，高分題冇足夠時間做。

而為何要拿學校試卷呢？因為最真，咁效用一定係更好的。而坊間買的通常比學校的深一點，又唔夠貼近學校的出題。不過，當拿不到自己學校或其他學校的卷，坊間買的都照殺。

在此，特別感謝小一小二時特登為我準備了很多學校卷的朋友，小一是第一年，特別重要，多謝你！我會記得的。