阿仔又中計了

話說阿仔今日最後一日測驗，測完驗大家都好開心，又輕鬆，去麥記叫了兩個餐加18件麥樂雞放肆一下。

阿仔說：「媽咪，今日係咪鍾意做乜都得呀？」

我當然立即說「是」，因為我昨天才說過「努力埋今日，明天鍾意做乜都得」！

點知衰仔說：「今日我要玩電腦遊戲。」

我心一沉：平時都冇時間睇書和做速度訓練，今日難得有時間，你唔睇書走去打機？！

表面上我不動聲色，說：「好呀！」

回到家，阿仔去了厠所痾屎，於是媽咪就開始佈陣，將佢最喜歡看的書扔得滿屋都有，去到邊度都總有一本喺左近，hehe.....

然後用手機（不用電腦，怕他被引了玩電腦遊戲）播了「畫叮噹」歌，仲播咗幾個版本，仲有日文版。佢果然中計，一從厠所出來就問：「你頭先播咗咩歌呀？」

於是，佢就開始睇呢段片，於是睇得興起我當然適時提供了紙筆，於是佢當然照住畫起來。

慢慢畫就畫成咁。

然後我就叫佢畫快啲，首歌唱完就要畫完啦，佢畫咗n個再加上阿媽指導點樣可以畫得更快之後，終於可以在首歌唱完就畫完啦，即係佢今日做咗速度訓練了！

仲使問，佢當然發現咗其中一本包小龍大方塊歷險記，係佢新寵，而佢阿媽就知道佢睇完一本會睇第二本第三本，趁佢徜徉書海，我已經在靜靜地上網寫了這篇blog。

爸爸和我不同的是，爸爸什麼都會大聲說出來「阿仔你應該要....」, 我永遠都不說出來，因為我仔係「包拗頸」來的，說嗰樣佢就偏
唔做嗰樣，久而久之，我就學會了引導，但爸爸教極都未識囉！有時我佈緊局，佢在在一邊叫出來，咩都穿哂煲！