溫情商業家

前四天考試， 連續去咗四日麥當勞食中午飯，因為屋企附近嗰間麥當勞新裝修，有玩具玩，搞到好似科學館咁，阿仔根本醉翁之意不在酒，反正麥當勞嘅嘢佢都鍾意食，所以日日都要去麥當勞。

但係我真係有啲嘢覺得好睇唔過眼。

相中見到有兩個女學生，其實佢哋總共有四人，佢哋每人買咗一碗麻辣麵，咖哩麵，豬紅魚蛋......諸如此類嘅東西，喺麥當勞食，除咗其中一個女學生有買一杯麥當勞嘅橙汁，基本上佢哋完全冇幫襯，但係佢哋大搖大擺咁喺度食，佢哋食嘅嘢味道好大，我真係覺得好奇怪，點解佢哋完全冇唔好意思嘅感覺呢？ 又話羞恥之心，人皆有之嘅？

呢個阿媽連續兩日喺麥當勞餵飯，既然佢鍾意喺麥當勞餵飯，都唔緊要啦，買少少麥當勞嘅嘢食囉，但係佢自己買咗一盒點心自己食，冇買任何麥當勞嘅嘢。

嗰一間麥當勞基本上，我哋每一次去見都會見到一個白髮蒼蒼嘅老婆婆，佢好似喺麥當勞住咁樣，日日都喺嗰度打躉，而家麥當勞新裝修，有咗斟水機，佢仲可以有免費嘅水任斟。

對於呢個老婆婆，我反而覺得十分同情，我諗佢一定係太悶，麥當勞比起公園更加有人氣，所以佢鍾意匿喺呢度，我可以體諒，但係另外嗰兩個cases,我就覺得不能原諒啦， 佢哋基本上都應該要有少少幫襯，唔應該一樣嘢都唔買就大搖大擺咁樣坐喺度。 其實喺度混吉仲有好多，有啲人喺度補習，有啲人喺度溫功課，有啲人喺度傾保險， 但係佢哋最基本都係有少少幫襯嘅！

總結，麥當勞真係一間有愛心嘅慈善企業。 其實呢件事已經畀報章報導過好多次，有啲露宿者甚至在24小時營業嘅麥當勞嗰度瞓。

希望麥記 被中信收購咗之後，唔好咁快改變。 在冷漠無情嘅香港，商業家之中，佢係最後 一間有人情味的。