一樣的人一樣的教法

就快放聖誕假， 學校派回所有工作紙， 我發現阿仔有好多份小測， 全部都係數學科 ，小測不但只有分數， 更有排名， 每一份卷都有排名， 老師會根據排名給印仔， 印仔多就可以換禮物。

這本靚靚龍貓簿， 就是阿仔換返嚟的禮物。

其實我真係幾佩服呢個數學老師， 因為佢唔單止不停咁同佢哋做小測 ，仲夠膽喺小測上面列出排名， 這個是需要勇氣的 ，你知香港的家長多敏感 ，分分鐘會話你成日測驗 ，壓迫民族幼苗， 又會話你變相支持tsa ，仲要有排名添！ 可能又會話你過於功利，鼓吹競爭， 又可能會話你冇顧及SEN嘅同學嘅感受, 總之香港嘅家長 係可以有好多說話。

呢個數學老師嘅做法， 同我嘅做法非常相似， 我都係經常同阿仔操卷 ，數學科同其他科目唔同 ，必需要經常做測驗卷， 否則小朋友會唔識得控制時間 ，好多控制時間的技巧， 都係透過訓練返嚟， 我見老師已經同佢做咗咁多份， 我立即抽起曬所有嘅數學卷，改為和阿仔研習作文。

其實我都唔喜歡經常操練小朋友，但係我哋唔能夠將洗澡水同嬰兒一齊倒掉， 操練係唔好 ，但如果係0操練嘅話 ，會令到小朋友在真正考試嘅時候， 遇到好大挫折 ，最主要都係時間控制不當 ，小朋友識睇鐘， 唔代表佢有時間管理嘅能力 ，管理時間係從不斷嘅練習裏面學習得到，係一種sense， 係透過反覆嘅訓練才會拿捏得到嘅sense。

數學老師曾經解釋， 佢點解要將排名寫係測驗卷呢 ？係因為將來你入咩中學， 最主要都係睇你數學科嘅成績 ，佢話語文科大家嘅相差嘅分數唔多 ，但數學科差距可以係又十幾分至到一百分 ，所以唔好呃自己啦 ，早啲知好過遲啲知，早啲知有得追， 遲啲知死硬，我就係鍾意佢咁NT, NT 型格的人，眼光看著將來， 不是目前的小事，唔會婦人之仁！

呢個數學老師 ，係我個同類， 大家都係NT型，同樣嘅人用同樣的教法。 不同類型嘅人，難以互相了解對方的教育。