昨日去了奧數比賽，撞到個幼稚園同學仔，佢走時，我們進場，原來佢考五年級奧數，即係跳高了一級考，奧數已經難，再跳高一級考，莫非係數優兒？但幼稚園時又真係睇唔出喎！
個同學仔同我講，因為佢地學校讀少人地一年，所以先要跳級考。個小朋友的爸爸係超級內向，立即拖住個仔走了。我都習慣了，成個幼稚園階段，佢兩公婆都冇同人有咩眼神接觸，除了同老師溝通，平時都係當睇唔到其他家長的，個小朋友反而很外向，這個組合好少見。
小朋友讀的是直資學校「真道書院」，佢地小學中學一條龍讀11年。這點我早就知，但又真係唔知原來小朋友出賽搞到要越級挑戰喎！
睇返班級結構，佢地等於冇咗小六咁囉！咁點解同我仔一樣大，要考小五呀？係佢自己選定大會規定？不得而知了。
對真道書院有興趣的各位，自己可以研究一下：
其實因為地點都好近我地，當年佢的介紹講座我都有去聽，聽完係一舊雲，因為佢講來講去都冇講到點解要將課程縮短到11年，冇理由為了小朋友可以早一年上大學慳一年學費，就搞咁多嘢㗎！佢哋要將啲閒科減省，又要在其他學校考完試唔教書的時間去教，搞到咁鬼死趕，為乜先？
仲有就係為乜要搞到個小朋友16歲同人地17歲的去拼DSE先？差一年的操卷時間，除非係資優兒，否則都幾吃力噃！但我又唔覺得佢係揀資優仔來收噃，佢第一關考掟豆袋畫下線咋喎！
不過，最重要的是睇成績啫，咁佢有幾多人上大學先？咁聽講又唔少喎！但應該係外國大學多囉。
網上話IB成績係咁：
真道書院第一屆IBDP(國際文憑試) 成績昨晚出爐，整體成績優秀，平均分38.3 (IBDP 滿分45)．取得40分以上有40.0%，取我35分以上有93.3%，成績不錯，值得鼓舞．大部份學生均獲得大學預先取錄，包括香港、美國、加拿大、英國等．
因11年一條龍中小學學制關係，今屆真道書院 IB 學生平均畢業年齡為16.8歲，較為年輕。有部份學生會在大學校園度過其 17歲生日了。
今次首屆ＩＢＤＰ成績對學弟學妹是一種鼓勵。祝他們前程錦繡，向人生另一目標進發！
*********
總而言之, 如果你打算俾子女去外國讀書，在真道書院讀完十一年，考完IB，拿住成績就正好去外國讀grade12（網上說的），預備在外國升學，時間配合得正好。
不過如果你打算考DSE上本地大學就唔好玩了，提早一年同人拼，温少一年，即係讓賽啫！
原來係咁！咁點解當年的講座唔講清楚啫，呢啲好大件事㗎嘛，成場就係講點樣啟發興趣，點樣唔使穿校服，呢啲嘢重要咩？如果我冇準備錢俾個仔海外升學，讀到高中先知，咁咪好大鑊？連我咁精明的人，都完全聽不出，一般忙碌生活的媽媽，邊理得咁多，收咗就讀咗至算啦！但係讀到一半想走的話，又產生另一個問題，你跳出去讀幾多年班呢？人地其他學校如何理解你張成績表呢？
話說回頭，點解真道唔講清楚係為出國留學而設計的學校呢？好簡單，因為唔係人人都可以修IB課程啊，聽講要經過挑選，要英文好先得。
講起英文，又想起佢地的中文課程，佢地係用大陸出版的課本的，即係簡体？！外國人全部學簡体的呀！都話咗佢係配合外國課程啦！（有冇人話我知，佢啲學生寫繁定簡㗎？）
如果讀真道，又入唔到IB課程，結果真係.....er.....er.....唔知呀，各位為孩子準備升小的博友，想清楚先好入，咪一味貪係英文學校，準備咗錢出國未先？
沒有留言:
發佈留言
歡迎來到好奇媽媽的世界！