跑步計劃還能持續嗎？

跑步計劃因為七、八、九月份天氣太熱，真係頂唔順，取消了，部分時間改為了游泳。雖然調景嶺有室內運動場，但係對於我哋嚟講一啲都唔就腳，要搭地鐵先至去得到，而且我哋試過跑，感覺裏面嘅空氣唔係咁好， 跑道都幾窄。 最近秋高氣爽， 我哋又再進行返跑步計劃，但發現我哋去開嘅跑步徑正在進行維修， 淨番半條可以跑，同一條跑道人來人往，跑起上嚟真係唔係咁過癮。

於是我哋改為一星期三天放學去打籃球， 附近有一個籃球場比較少人玩， 我哋只要帶個波去就得啦。

除了籃球場， 還有足球場，閒日佢哋都唔係咁多人玩， 我哋又係帶個波去就得啦。

不過暫時我哋都淨係玩籃球， 因為唔想帶住兩個波， 淨係玩籃球帶一個波就夠啦。 我個仔打籃球仲係處於好鬼渣嘅階段， 佢根本唔夠手力將個波定上籃， 最多都係掂到個邊， 從未入到球， 所以我哋要繼續練習。 身高都係一個問題， 個籃球架對佢嚟講係高咗啲。

但係最令人興奮嘅係，昨日我哋發現， 原來籃球場側邊有一條緩跑徑。 呢條緩跑徑非常偏僻， 整咗喺天橋底， 又冇指示牌， 周圍仲好多植物遮住， 真係唔容易發現， 哈哈哈！ 但係咁先好， 因為少人跑， 終於唔使撞口撞面都係人。

所以我哋個跑步計劃就可以恢復啦！