上次假期爸爸淘寶淘咗兩個競速魔方畀阿仔，一個二階，一個三階，我哋睇咗好耐說明書，都搞唔掂。點知有一天，在泳池門口，阿仔遇到一個哥哥玩緊魔方，阿仔見到哥哥玩緊五階魔方，非常好奇，於是乎走去請教嗰個點樣玩，哥哥就話畀佢知，喺youtube搵岑sir嘅短片，就可以學識魔方。
果然岑sir的短片解釋得非常清楚，最近考完試，終於有機會練習，阿仔學識咗二階之後， 十分有成功感，於是最近不停練習，短時間內由每次五分鐘，慢慢縮短時間， 昨日20秒已經可以扭完一個魔方， 打破咗佢自己嘅紀錄， 佢性格沉迷，一喜歡上一樣嘢就會不停做，好在已經考完哂試， 我哋就由得佢，佢最近都沒有怎樣看書，我就由他放一放下吧！至於三階魔方幾時學，我等佢自己開口問先至畀佢， 孩子最清楚自己的感覺，既然是玩樂，也就沒所謂了。
扭魔方其實係一項腦力活動， 我初時以為只係手部運動， 就播故事畀佢聽， 以為佢可以一面聽故事一面玩， 點知佢試咗一陣就要求我停止播放。平時佢可以做到一面聽故事一面畫畫， 一面聽故事一面砌lego， 但原來扭魔方係唔得嘅！ 即係玩扭魔方其實係用緊腦， 唔係淨係用手， 扭魔方要求熟記及運用公式， 怪唔之得「最強大腦」經常都有魔方競賽。 我見阿仔與時間競賽，不停係咁扭魔方，結果一頭大汗，玩到最後仲好攰添！ 所以想訓練小朋友用腦嘅家長， 可以畀小朋友學魔方。
唔知點解， 我每次推介人哋玩魔方， 啲人總係覺得好難， 我個仔應該學唔識。 不過我認為， 其實係每個小朋友都學得識嘅， 尤其是係男仔， 因為貪玩嘅動力好大， 就算幾難都學得識，信我！
買魔方嘅時候記得要買「 競速魔方」， 呢啲魔方比較順滑， 當小朋友已經學識咗之後，佢哋就要追求速度， 咁何必買一個難扭的呢？
我在淘寶買, 22蚊兩個。
沒有留言:
發佈留言
歡迎來到好奇媽媽的世界！