止肥進行中

我而家做緊嘢，我唔叫做減肥，我叫做止肥，防止自己再肥落去。 回想當年， 即是十年前我結婚的時候，我的體重是114磅， 我當時的理想體重是105， 十年後的今天， 我的體重是124， 而我嘅理想體重係114， 照咁樣嘅邏輯， 十年後我的體重應該係134， 而理想體重就係而家呢一個體重124， 咁即係話， 只要我唔肥落去， 十年後我就係叫做「 理想」 了！哈哈！

人之所以減唔到肥， 就係因為我哋每一刻都覺得自己只要努力就可以減到肥， 就好似廣告入邊嗰啲奇蹟咁。 而事實上，大部人只會越來越失控， 否則街上面點解咁多身材走曬樣嘅大嬸呢？ 你睇下肥媽同薛家燕， 曾經都減到好瘦㗎， 最後又咪肥返！ 因為當你肥慣，身體就會記憶咗你呢一個重量， 就算收咗， 過一段時間又會肥番 ，所以最好嘅減肥方法， 就係唔好畀自己有新紀錄。

開始了個幾禮拜，真係見到成效， 我真係冇再肥落去啦， 而且明顯係瘦咗。 有冇咁神奇呀？ 我自己都唔信， 只係一個小小嘅生活轉變。

而家我係企住睇電視的， 因為我成日都煲劇和看書， 一日兩三個鐘， 我真係企兩三個鐘， 我會企得好直， 甚至會幫自己拉筋， 初初都覺得幾攰， 堅持咗一個禮拜之後， 曾經喺瞓覺嘅時候小腿抽筋， 可能有少少肌肉疲勞。不過，真是有效，開始有返個shape！

企喺度煲劇， 係適合全職家庭主婦的，全職主婦，其實初時唔係肥，而係鬆弛 。從前當你要返工嘅時候，你穿的衫會比較緊身，而且你唔可以攤喺度，因為畀老闆見到唔係咁好，所以返工嘅時候冇咁容易鬆弛，但係喺屋企就唔同呀，你會穿啲好舒服嘅衫，然後好輕易就攤落嚟，所以 全職主婦最大嘅問題係鬆弛。

全職主婦個肚腩點解咁大呢？係因為腹部嘅肌肉鬆弛，咁就唔可以將啲內臟緊緊hold住，其實突出嚟嘅不止是脂肪，還有內臟。 我發現呢樣嘢，係因為其實我個體重並冇增加好多，但係視覺上真係比以前肥咗好多，咁係咩原因呢？ 有一日，我喺網上見到一個教做運動嘅女人叫做劉美儀，佢就咁樣解釋畀我知。係因為肌肉鬆弛，所以先至會有胃腩肚腩，最好嗰方法，唔需要做劇烈嘅運動，而係輕微而講耐力嘅運動， 如果運動激烈， 練出肌肉，反而唔靚。

我見有啲媽媽非常之努力， 成日都去跑步和做瑜珈， 將身段變得好靚。 但係我覺得長遠嚟計唔係咁妥當， 因為而家三四十歲， 當然有體力去應付龐大嘅運動量， 但係當你年紀大咗， 活力減低， 運動量必定會減少， 跟住就會反彈得好勁。 因為身體已經適應咗咁大嘅運動量， 只要你一停下來， 就會變成巨人。 我親眼見到身邊嘅朋友就係咁， 四十幾歲生完第二個bb， 仔交畀工人湊 ，日日去做瑜珈， 身材非常之fit， 不過一踏入50歲， 就開始一發不可收拾。

人生係睇長線嘅， 應該要有一個整體嘅規劃， 而家做緊嘅嘢，同你10年, 20年, 之後係息息相關， 你想你自己二十年之後係點，再推前演算，就知道今日要做咩事。

由於我想我仔10歲能輕鬆應付學業，20歲時能有機會學有所成， 所以我做早教。