自然療法唔好玩咁大

近年聽到人講自然療法，到底是什麼來着？且看看維基百科：

簡單點說，就是死都唔用西藥，唔睇西醫囉！

由舊blog開始看的博友都知我最反對人胡亂用西藥啦！我成日都話「 逢藥三分毒」 ，以前個仔細，我比較多分享養生之道。

像我一個咁講求強身健體之道的人，真的，也很難贊同自然療法。何解？

你用常識推理一下都知道唔妥啦！

其實一百幾十年前，未有西醫，大家不是就是用「自然療法」囉，以前的人边有西醫西藥，有咩事便 求神拜佛，看中醫， 用偏方，乜都做曬。 結果以前嘅死亡率，高過而家好多。 嬰兒夭折率亦都高好多， 所以啲人通常會生多啲小朋友，預咗有幾個養唔大。

而家咁嘅世代， 啲人越嚟越長命， 好明顯係因為 西醫、西藥、手術等等.....醫療科技嘅進步， 呢啲根本係常識， 相信你唔會同我拗，啲人長命咗唔關西醫事。 確確實實擺在眼前嘅事實，我唔明白嗰啲人點解會覺得應該完全唔用西醫西藥，而走去用一啲古靈精怪嘅治療方式。

甚至仲有激進嘅自然療法支持者，連小朋友打預防針都唔畀，呢個我更加覺得匪夷所思，佢哋嘅原因係話，預防針嘅製造過程點點點， 老實講我都唔清楚，因為我冇認真研究。 

點解我一個咁八卦嘅人都唔去研究呢？ 因為冇數字能夠令到我信服。 以前未有小兒麻痺症預防針，我真係見到街上面有好多小兒麻痺症嘅 傷殘人士，而家幾乎見唔到，見到的都年紀大的， 即係未有疫苗嘅時候出世。 我當時見到佢哋對腳，個心就乸住乸住， 所以當我有小朋友嘅時候， 見到有小兒麻痺症嘅預防針又點會唔打！？事實上，政府規定要打。 其他政府冇規定要打嘅，我在仔細研究之後都決定要打。 例如： 輪狀病毒口服疫苗。 其他嗰啲針，例如腦膜炎、 乙型肝炎、小兒麻痺症、天花、白喉、德國麻疹，中咗就永久傷殘， 當然要打。 但係輪狀病毒口服疫苗， 雖然中咗都係入醫院啫， 不過根據統計，平均每個小朋友喺五歲之前都中一次，命中率超高。 咁我計下數， 輪狀病毒口服疫苗當時七百幾蚊， 入一入醫院起馬萬幾蚊埋單， 我哋有買醫療保險， 就算係保險公司畀， 個小朋友都辛苦㗎， 咁點解唔食呢？ 當然即刻食埋啦。

有時見到啲報道話，有人因為對疫苗敏感所以打咗之後死鬼咗， 老實講， 食糯米雞哽死嘅都有， 咁係咪唔好食糯米雞呢？ 最緊要睇下個命中率， 幾百萬人如果有一個打完疫苗會死， 咁想問下你， 唔打疫苗之後會死嘅機會率係幾多？ 如果唔打之後會死嘅機會率高啲， 咁當然應該要打啦！

做決定係講數字， 咪睇埋啲報導，就亂咁來， 你知而家，好多報導都係譁眾取寵。

講番平時在小朋友生病嘅時候是否應該用自然療法呢？ 我覺得應該係，唔好亂咁睇醫生，但係要有底線， 舉個例：普通流鼻水打乞嚏， 可能少少感冒，可以唔睇醫生，因為人有抵抗力，自己捱下都會好。腸胃炎，先等小朋友痾哂嘔哂，再觀察下，好多時，嘔曬啲污糟嘢就咩事都冇， 表面上又屙又嘔好兇險，其實反而係小事。 但係發燒嘅時候要小心處理， 曾經一個好相信中醫嘅媽媽，個仔發燒帶個仔去睇中醫，個中醫都叫佢去睇西醫，咁即係話呢個中醫好識得保護自己，因為發燒可大可小，根本唔知道嗰隻菌係乜嘢來路，可以好小事，亦都可以好大件事，如果持續燒咗幾日都唔退，或者燒嘅時候度數超過39度，都係睇西醫比較穩陣，千祈唔好玩自然療法玩大咗， 個細路有咩冬瓜豆腐，阿媽精神上根本活不下去，因為太過自責，呢啲大事，冇得任性，輸唔起。