如何選擇小學

昨日有blog友問我關於選擇小學的意見，我已經回答了她，在這裏，我想將 一些選擇學校嘅方法寫出來， 讓其他將來會選小學嘅朋友， 作為一個參考。

第一 ，blog友好關心到底應該選a學校， 定係b學校， 我認為選邊一間學校， 名氣及感覺其實唔係咁重要。小學同中學唔一樣，中學係分banding㗎！成績差嘅學生，會全部入曬 band2 band3， 成績好嘅入band1，由於成績差嘅學生變壞嘅機會率大，所以我哋選中學嘅時候要特別審慎，但係其實，那是完全同佢哋嘅成績掛鉤嘅，到中學時家長可以做到嘅嘢，係唔多嘅。

而選小學呢，因為小學係沒有banding之分嘅， 所以間間其實都差唔多，一樣係有好嘅學生，有壞嘅學生， 你喺小學嘅階段， 父母其實係大量咁樣參與學校生活的，所以一間好嘅小學的定義， 我認為係要配合到小朋友嘅作息，校園生活環境以及時間安排，先至最重要。

大部分媽咪做呢啲決定嘅時候，都好鍾意去朋友嘅意見，又或者上網睇其他媽咪嘅意見，我本人係絕對唔贊同單純使用呢一種方法去選擇學校，因為我覺得人人嘅感覺都係唔一樣嘅， 一個人覺得好正，另外一個人又覺得好差。 其實佢哋之所以有唔同嘅感覺，係因為小朋友都唔同類型， 而你查詢嘅媽咪，可能佢哋嘅小朋友，同你嘅小朋友性格完全不同，小朋友唔一樣，自然適合嘅學校都唔一樣，所以我覺得只可作參考用途。

當我哋要做重大嘅決定嘅時候，必須以理性同埋數字嚟做分析。

蒐集資料，將你心儀嘅學校嘅資料填係一個excel表格上面，有啲咩項目要填喺上面呢？

第一，校園嘅大小，呢一個資料非常之容易搵， 嗰間學校佔地幾多呎呢？係新校舍定係舊校舍呢？ 位於乜嘢地方呢？環境是否衛生呢？ 舉個例：有一間叫做九龍禮賢學校，呢間學校嗰個派位成績非常之理想，但係我絕對唔會選擇佢，因為佢個校園好似豆腐潤咁細， 小朋友喺呢啲學校嗰度讀書，好似囚禁係一個鳥龍咁，你要設身處地諗一下，佢要喺嗰個咁窄嘅環境七至八小時，而且屋企亦都唔大，咁佢全日都係一個好細個空間，咁對佢整個人嘅健康呀，視力呀，完全都係冇好處。

第二，作息時間。到底嗰間學校上課嘅時數係幾長呢？有啲學校上課嘅總時數係超過七八個小時嘅？小朋友上咁耐嘅課，咁長嘅時間對佢哋專注力嘅要求非常之高，亦都好攰。所以呢，最長上課時數嘅，我係絕對唔會考慮。

第三，食飯時間。食飯時間差距非常之大，最嚴重的學校係只係得20分鐘食飯，呢啲學校我係絕對唔會揀嘅，我起碼都要有 40或者50分鐘嘅食飯時間，先至會選擇， 急促進食是胃病的起源，這個是常識，學校連這個常識也沒有，根本不配做教育者。

第四，校車嘅上車時間，早上瞓多一分鐘都係好的。

第五，師生比例，開班嘅數目，小班是比大班好， 但如果開班太少個學校，有機會殺校。

第六， 口碑。我將最人性化的口碑， 都會打一個分數， 作為一個考慮嘅條件。

第七，升中情況。 我擺佢喺第七位唔係因為佢唔重要，而係因為我諗到嗰樣講嗰樣，以上嘅論點重要嘅次序，大家心目中自己去做決定。 提提大家，唔係派位派到好學校嘅人越多越好嘅，我自己都會偏向揀一啲 派得唔差， 而唔係派得最好嘅， 因為越派得好越催谷， 而派得差嘅一定有佢嘅問題， 如果嗰間學校係有直接銜接嘅中學，咁就係最理想啦！ 起碼有一個保險。

第八， 學費及其他開支。

做咗excel表之後，用邏輯思維去做一個分析整理， 所有嘅大公司重大嘅決定都係咁樣做，唔可以因為街邊嘅張三李四胡說八道就去胡亂作決定。

我有啲朋友選擇學校嘅時候，原因都好古怪，例如：有人揀自己間學校係因為嗰間學校嘅伙食好， 中午有紅米飯可以揀。

有人係因為嗰間學校的小食部 阿叔阿嬸 十分nice， 所以佢推論成間學校都係好好，我覺得咁樣好奇怪。

係人都知道老師係最重要嘅，如果我間學校老師係標榜有愛心嘅，真係要特別加分。但係，到你個小朋友入讀呢間學校嘅時候，老師會唔會又換咗呢，呢啲就會存在住 一啲嘅不穩定因素，所以老師好咁重要，我都只係列入口碑之中去計算，佔比重不特別高。

試過有一個朋友，她的女兒考到兩間質素十分接近的學校，但兩間完全不同風格，各有各好，我就建議他將兩間學校的優點和缺點表列出來，看看誰的優點最多，缺點最少，以此作一個決定。