有冇邏輯㗎！

有一日，係街邊買咗一兜腸粉，一路食一路覺得不解，點解世界上會有人咁蠢 ，將醬料放喺最下面嘅呢？即係剪腸粉嘅人，首先就落咗嗰啲醬料喺底，然之後再剪腸粉。我見啲腸粉白曬曬，問佢有冇落醬，佢話已經落咗，我初初以為佢係落咗喺中間 點知原來佢係落咗喺底！大家試下投入啲，代入我角色，點樣可以喺一個咁窄嘅膠兜先吃底部的腸粉呢？於是乎我就唯有食咗部分上面嗰啲白腸粉先，等個膠兜比較鬆動， 然之後就好努力咁樣，挖下面啲腸粉上上面！然之後我要花咗好多嘅時間， 先至將所有嘅調味醬料混合。

我覺得佢個腦的邏輯系統應該出咗問題，佢咁樣做嘢法， 為個客戶帶來好大嘅麻煩，表面上睇係一件小事，但係如果呢啲人，唔係賣腸粉，係做其他有重要性嘅工作，可以好大鑊，所以呢啲人，永遠都只可以做低三下四嘅工作。

不過世事無絕對，只要生得靚，係可以唔使做。

話說我朋友講，佢識得一個媽咪，話自己個女 成三歲都完全未識字，無天份！咁我朋友就叫佢要教個女識字，跟住佢先至「恍然大悟」，乜原來係要教㗎？

冇教過，無端端又點會識呢？ 就好似嗰兜腸粉咁，醬料擺喺下面，人哋點食呢？ 呢D人有冇邏輯㗎！

就算係貝多芬啦，你擺佢喺沙漠出世，一個鋼琴都冇，佢無端端點會做咗鋼琴家啫！

我真係頂唔順，問佢呢個朋友點樣生存喺世界上？ 佢話因為生得靚， 做咗少奶奶。 我翻了三個大白眼。