計劃消費模式

市面上嘅練習越來越貴，閒閒地都五六十蚊一本， 只有一間出版社， 間中會狂減 ，佢就係 樂思 躍思 眾課堂， 佢而家又減價喇 ！在中華書局 、三聯書局 ，30蚊一本 ，呢個優惠做到 1月27號。

大家千祈唔好誤會， 我唔係支持tsa，係因為呢幾本練習， 可以在考試之前用嚟操卷之用。 價錢平嘅時候買定， 就唔使要用嘅時候冇， 我通常都係買數學 ，雖然操練係唔好嘅 ，但係數學如果唔操練， 係自尋死路， 無論你幾咁叻， 都係要做過 ，先至唔會錯。 至於點解 要做到 咁少錯呢 ？係因為 我推行嘅係精英教育 ，我希望個仔成為精英， 大家唔想個仔成為精英嘅， 唔好歧視我 ，互相尊重。

而 以上出版社 做緊減價嘅 中英文練習， 裏面有 listening， 仲有cd 用來訓練聽力， 咁嘅價錢 ，真係抵到爛。 平時 減價時， 買定生活所需嘅嘢， 咁到要用嘅時候， 就唔洗用貴價去買 ，不過呢樣嘢， 係好講計算能力， 有好多人， 就係咁 買到一屋都係野 ，而果啲嘢又係冇用過嘅 ！

因為我同我老公， 都係比較識計數 ，所以我哋好少 會買多咗 ，通常都係 最後用得曬 ，最重要係買嘅 東西 ， 有效期要夠長， 咁就可以慢慢用， 好似呢幾本練習 ，其實係四五六年班用嘅， 我個仔先至小三 ，有大把時間 ，可以慢慢做 ，所以睇落好似好多 ，其實一啲都唔多。

今次上大陸 ，我哋淘寶淘定 ：適齒美牙刷 、上海硫磺梘、 高露潔牙膏、 仲有皮帶 、衫褲鞋襪、 全部都係未來 一兩年要用嘅生活用品 ，在大陸買平好多 ，而且質素 比香港的 可以 沒有差別， 甚至更好， 其中有幾件內衣褲、 襪子、 我簡直係覺得啲棉質靚到不得了！ 原來呢種叫做新疆棉， 喺香港真係要好貴嘅價錢先會買到咁嘅質素。

不過講到質素， 又係睇你識唔識買 ，淘寶其實都有好多技巧 ，盡量買返大牌子 ，原廠貨 ，又要睇評論、睇銷量， 資料分析能力要有番咁上下功夫，才可以做個精明消費者。

如果你買嘢比較隨性, 去淘寶有機會會搞到一身卡數, 好似我呢啲比較理性嘅消費者 ，就冇呢個問題 ，係真係可以慳到唔少錢。

呢種預先買定必需品嘅消費方式 ，係叫做「 計劃消費」， 就好似運作一間公司咁， 去運作一個家庭， 一間公司係唔會到要買要用文具嘅時候先至去買， 而係提早格價，大批入貨 ，用完之後再入另一批。 避免隨意在街上閒逛， 避免 想買就買， 咁就可以買少好多無謂嘢。