奇怪的負面思維

有一日，有個朋友send條link畀我，係介紹一啲兒童文學書，例如： 林海音 嘅城南舊事，又或者係林良先生的兒童文學作品，嗰篇文章嘅作者將佢認為最好，適合小朋友睇嘅文學作品介紹畀大家，佢仲認為多啲睇優質嘅文學作品，可以令到小朋友將來嘅作文更加好， 一片誠意嘅分享，但係估唔到，睇下面嘅評論就真係嚇一跳， 呢個只係一個擷取，其實下面仲有好多好多類似佢咁樣嘅評論！ 我估唔到咁多人有呢種想法！

我唔明白點解有人會將別人嘅一番好意，理解成為惡意，我認為係神經病！如果看文學作品 係為咗令作文更加出色係唔啱的話，咁乜嘢係啱？唔通大家一齊睇漫畫，一齊講爛gag，一齊睇八卦雜誌，先至叫做係開心嘅閱讀咩？！

又打個比喻，我推介梁朝偉嘅電影，然之後，你鬧我：「你以為睇咗梁朝偉就可以做影帝？你知唔知睇電影唔係為咗做影帝！睇電影響為咗開心㗎！所以你一定要睇曾志偉！」

人地介紹梁朝偉嘅電影，你唔鍾意睇你咪唔好睇囉，咁點解要鬧人哋係為咗 成為影帝所以先至睇梁朝偉！咁就算我真係想成為影帝，想喺梁朝偉身上學習演技，又有何不對呢？

如果一個人，將別人誠意嘅分享，全部曲解當作是別人的炫耀，又或者覺得別人另有所圖，咁樣真係 永遠都唔會得到快樂，更加冇可能得到成功，因為佢心胸太窄，成功根本住唔到入嚟， 愉快更加住唔到入嚟！