唔返工唔代表窮

上次去資優課程，巧遇鄰居小朋友和他的父母，鄰居小朋友讀某直資名校，學n咁多樣東西。以前因為住對門，那個小朋友只大我仔一年，很適合做玩伴，我曾經問過他的父母可否讓兩個小朋友一起玩，但他的父親拒絕了，他拿出孩子的時間表，真是安排得滴水不漏，日日都填滿哂。

其實我們還感覺到有一個原因。孩子的父親很閃縮，很怕和我們交往。這個是為什麼呢？我們覺得是那個爸爸好像「失業」了，出沒的時間像家庭主婦，而太太上班則很忙。我們估計他們是「男主內，女主外」，其實前幾年是調轉的。

現在都什麼年代了？就算果真男主內，女主外，又如何呢？如果那位先生光明正大地望人，不急急腳，我們才不會懷疑他「失業」啦！有樣東西叫home office㗎嘛！

由於以前工作原因，我真係唔敢睇小人，當人「失業」和「冇錢」。以前在銀行，見識過有兩千萬身家的執紙皮阿婆，幾百萬身家的公屋戶， 真係禾稈冚珍珠 。而身光頸靚但户口冇錢的，我們亦不敢小窺，誰知道他其他銀行會否有幾億啫！

記得有一次，有個同事向我訴苦，話信用咭部死板，佢個PB客（優越理財）有兩千萬在户口，但連七千蚊信用額的信用咭都唔批俾佢，原因係佢「失業」，女人失業可以當家庭主婦，批到；但男人失業是申請不到信用咭的。天！我有兩千萬都玩失業啦，仲邊得閒同你玩返工啫！銀行都傻傻地。不過近這幾年銀行像改善了，沒有了這個漏洞。不過我不知道是一兩家沒有這個漏洞，還是全部都沒有了。